Pavlodarda júkti áıel kópirden sekirmek bolǵan
PAVLODAR. KAZINFORM - Pavlodar oblysynda polıtseıler áıeldi qutqaryp qaldy, dep habarlaıdy Polisia.kz.
28 maýsymda saǵat 06:58 shamasynda “102” operatorynyń pýltine Ýsolka ózeniniń kópirinde áıel adamnyń sekirgeli turǵany týraly habarlama keldi. Oqıǵa ornyna patrýldik polıtsııa batalonynyń qyzmetkerleri Erqanat Qubaıdolla men Jaqsylyq Musabaev dereý jetti.
– Biz kelgende, qyz kúızeliske ushyraǵan, kózderi jasqa toly bolyp, qorshaýdyń artyna kóterilýge úlgergen, osy ýaqytta bireýmen emotsıonaldy túrde telefonmen sóılesip turǵan. Alystan biz ony sózge tartyp, oǵan bulaı isteý durys sheshim emes ekenine sendirdik, týystarynyń qandaı jaǵdaıda bolatyn túsindirip kórdik. Sodan janyna jaqyndap, onyń qolynan ustap, kópirdiń qaýipsiz jaǵyna qaıta kóterilýge kóndirdik. Biz úshin onsyz da úmitsiz turǵan qyz balany qorqytyp almaý mańyzdy boldy. Sebebi, bir sekýndtyń ishinde orny tolmas oqıǵa oryn alýy múmkin edi, – dedi qyzmet ınspektory Erqanat Qubaıdolla.
Belgili bolǵandaı, mundaı árekettiń sebebi júkti áıeldiń jeke kúızelisi boldy. Keıin polıtsııa ony jedel járdem dárigerlerine tapsyrdy. Polıtsııa vedomstvosynda óńirdiń polıtseıleri kún saıyn azamattardyń qaýipsizdigi men tynyshtyǵy úshin qyzmet etetinin atap ótti. Azamattardy qylmystyq shabýyldardan qorǵaı otyra, qıyn ómirlik jaǵdaıǵa tap bolǵandarǵa da kómektesýde. Mundaı jaǵdaılar az emes. Ótken jyldary sol kópirde polıtseıler jastardy birneshe ret ómirmen esep aıyrysý áreketterinen qutqardy.
– Qyzmet etý jáne azamattarymyzǵa kómektesý – bizdiń tikeleı mindetimiz. Bizdiń qatarymyzdaǵy barlyq polıtsııa qyzmetkerleri bul kásiptiń batyldyqty jáne adamdar úshin ómir men densaýlyqty qaterge tigýge daıyn bolýdy talap etetinin túsinedi, – deıdi polıtsııa qyzmetkerleri.
