Pavlodarda júk kólikteriniń akkýmýlıatoryn urlaýmen aınalysqan urylar ustaldy
«Pavlodarlyq polıtsııa qyzmetkerleri jedel izdestirý is-sharalary barysynda akkýmýlıator urlaǵan kúdiktilerdi ustady», - delingen Pavlodar oblystyq polıtsııa departamenti taratqan aqparatta.
Vedomstvonyń málimetine sáıkes, kúdiktiler tek júk kólikteriniń ǵana akkýmýlıatorlaryn urlaýmen aınalysqan. Kúdiktiler 12 tamyz kúni Novosıbırskaıa kóshesi boıyndaǵy úılerdiń biriniń janynda turǵan «KamAZ» kóliginen 2 akkýmýlıator urlaǵandary belgili bolyp otyr. Jalpy olarǵa 18 akkýmýlıator urlady degen aıyp taǵylǵan.
«Olar urlanǵan akkýmýlıatorlardy júrgizýshilerge tómen baǵamen satyp otyrǵan. Atalǵan fakti boıynsha QR Qylmystyq kodeksiniń 188-babymen sotqa deıingi tergeý bastaldy», - dedi oblystyq PD bastyǵynyń orynbasary Rashad Óteýov.
Kúdiktilerdiń biri Pavlodar qalasynyń ýaqytqa oqshaýlaǵyshyna qamalǵan. Al ekinshisi eshqaıda ketpeý týraly qolhatpen bostandyqta júr. Kúdiktilerdiń ekeýi de buǵan deıin dál osyndaı qylmystary úshin polıtsııa nazaryna ilinip, 3 jyldan bas bostandyqtary shektelgen bolatyn.
Anton Gagarın