Pavlodarda júk kóliginiń dóńgelegi jarylyp, er adam qaza tapty

Marqum jergilikti tehnıkalyq qyzmet kórsetý stansasynda qyzmet etken. Polıtsııa eńbekti qorǵaý zańnamasyn buzý deregi boıynsha qylmystyq is qozǵady.

— Adam ólimine soqtyrǵan jazataıym oqıǵa oblys ortalyǵynda tirkeldi. Aldyn ala málimetke qaraǵanda, júk kóliginiń dóńgelegin úrlep, ornatý kezinde shına jyrtylyp ketip, saldarynan stansa qyzmetkeri aýyr jaraqat alyp, qaza tapqan, — dep habarlady Memlekettik eńbek ınspektsııasy komıtetiniń Pavlodar oblysy boıynsha departamenti basshysynyń orynbasary Abylaı Sabyrov.

Oblystyq densaýlyq saqtaý basqarmasynyń málimetinshe, jedel járdemge shaqyrtý 7 qyrkúıek kúni saǵat 10.30-da túsken. Oqıǵa ornyna jedel jetken medıtsına qyzmetkerleri er adamnyń qaıtys bolǵanyn anyqtaǵan. Densaýlyq saqtaý basqarmasy jaraqattyń naqty sıpatyn jarııalaǵan joq.

Qazirgi ýaqytta komıtet mamandary qaıǵyly oqıǵa boıynsha tergeý-tekserý júrgizip jatyr. Onyń barysynda adam ólimine soqtyrǵan jaǵdaıdyń mán-jaıy men sebepteri, sondaı-aq eńbek qaýipsizdigi talaptarynyń saqtalýy anyqtalady.

Oblystyq polıtsııa departamenti eńbekti qorǵaý talaptaryn buzý deregi boıynsha qylmystyq is qozǵalǵanyn málim etti. 

— Qazirgi ýaqytta sotqa deıingi tergeý júrgizilip jatyr. Oqıǵanyń barlyq mán-jaıy anyqtalyp jatyr. Sotqa deıingi tergeý múddesine baılanysty ózge aqparat jarııa etilmeıdi, — dep habarlady polıtsııa departamentinen.

Eske sala keteıik, Almaty oblysynda jol apatynan eki jaıaý júrginshi mert boldy.