Pavlodarda jolǵa tehnıkalyq qadaǵalaý júrgizetin uıymdar jazalandy

PAVLODAR. KAZINFORM – Mekemeler jol sapasyn baqylaý kezinde jumystardy jetkilikti uıymdastyrmaǵan. Nátıjesinde tehnıkalyq qadaǵalaý júrgizetin úsh uıym jaýapkershilikke tartylyp, jalpy somasy 1,8 mln teńge aıyppul arqalaǵan.

Pavlodar oblystyq «Jol aktıvteri ulttyq sapa ortalyǵy» RMK fılıaly bóliminiń basshysy Qýat Nurmaǵambetovtiń aıtýynsha, ortalyq mamandary 120 nysanǵa 604 ret ınspektsııalyq tekserý júrgizip, 1 939 synama alǵan. Onyń 249-ynan talapqa saı kelmeıtin kemshilikter anyqtalǵan.

– Jumysty tıisti deńgeıde atqarmaǵan uıymdarǵa qatysty shara qabyldaý maqsatynda Ulttyq sapa ortalyǵy Pavlodar oblysynyń memlekettik sáýlet-qurylys baqylaý basqarmasyna 6 hat joldady. Nátıjesinde tehnıkalyq qadaǵalaý júrgizetin 3 uıym jaýapkershilikke tartylyp, salynǵan aıyppuldyń jalpy somasy 1,8 mln teńgeni qurady, - dep habarlady Kazinform tilshisine fılıal basshysy.

Onyń sózinshe, óńirde atqarylyp jatqan jol jóndeý jumystarynyń sapasy jetkilikti deńgeıde dep baǵalaýǵa bolady. Merdiger uıymdar jyl ótken saıyn sapa máselesine aıryqsha mán berip, buryn jiberilgen kemshilikterdi qaıtalamaýǵa umtylyp jatyr.

Jalpy Pavlodar oblysyndaǵy avtokólik joldarynyń jalpy uzyndyǵy 5,5 myń shaqyrymnan asady. Onyń ishinde respýblıkalyq, oblystyq, aýdandyq jáne qalalyq mańyzy bar joldar bar. Bıyl óńirde jol ınfraqurylymyn jóndeý jáne damytý jumystaryna bıýdjetten shamamen 60 mlrd teńge bólingen. Qazirgi tańda oblysta 120 joba júzege qolǵa alynyp jatyr. Onyń ishinde respýblıkalyq - 9, oblystyq deńgeıde - 9, aýdandyq – 22 joba bar.

Jol qurylysy salasyndaǵy eń iri nysandardyń biri – Pavlodar – Astana baǵytyndaǵy eski kópirdiń janynan jańa kópir salý jobasy. Atalǵan nysandaǵy qurylys jumystary 2024 jyly bastalyp, búginde qarqyndy júrgizilip keledi.

Sonymen qatar Atameken – Kóktóbe jáne Atameken – Ertis avtomobıl joldarynda kúrdeli jóndeý jumystary bıyl jalǵasyn tabady. Ortasha jóndeý jumystary Qalqaman – Baıanaýyl, Qaraǵandy – Shiderti – Pavlodar, Atameken – Kóktóbe baǵyttarynda, sondaı-aq Omby – Maıqapshaǵaı tasjolynyń Pavlodar – Jelezınka baǵyty boıynsha ýchaskesinde aıaqtalyp qaldy. Barlyq josparlanǵan jobalardy bıyl qarasha aıynyń sońyna deıin aıaqtaý kózdelip otyr.

Eske sala keteıik, Pavlodardaǵy jańa kópir 2027 jyly qoldanysqa beriledi.