Pavlodarda jolda mas kúıde qulaǵan azamatty kólik qaǵyp mert qyldy

PAVLODAR. KAZINFORM - Aldyn ala boljam boıynsha ol jaıaý júrginshiler jolynda mas kúıde qulap jatqan bolýy múmkin. Sot-medıtsınalyq saraptama oqıǵanyń aq-qarasyn tekserýde.

Pavlodar oblysy Ýspen aýdanynda «Gazel» avtokóligi jaıaý júrginshini qaǵyp ketken. Jaıaý júrginshi oqıǵa ornynda jan tapsyrǵan. Mamandar onyń mas bolyp, jol ústinde jatýy múmkin ekenin aıtyp otyr.

- Oqıǵa Ýspen aýylynda, Gagarın-Chehov kósheleriniń qıylysynda bolǵan. Boljam boıynsha qaıtys bolǵan azamat mas kúıinde jolda jatqan. Jol - kólik oqıǵasy saldarynan jaıaý júrginshi sol jerde qaıtys boldy. Sot-medıtsınalyq saraptama taǵaıyndaldy,-dep habarlady Pavlodar oblystyq polıtsııa departamentiniń baspasóz qyzmetinen.

Taǵy bir jol-kólik oqıǵasy Atameken-Ertis-Rýsskaıa polıana avtojolynda tirkeldi. «Mersedes» jeńil kóligi «Volkswagen» kóligimen soqtyǵysqan. Apat saldarynan sońǵy atalǵan kóliktiń júrgizýshisi men jolaýshysy túrli jaraqattarmen aýrýhanaǵa jetkizildi.

Eki oqıǵa boıynsha da polıtsııa tekserý sharalaryn júrgizýde.