Pavlodarda jol jóndeý jumystary merziminen buryn aıaqtaldy

PAVLODAR. QazAqparat - 26 qyrkúıek kúni respýblıkalyq mańyzy bar «Lenın kenti-Aqsý-Kóktóbe-Úlken Aqjar-Kýrchatov» avtojolynyń 25-35 shaqyrymynda ortasha jóndeý jumystary merziminen buryn aıaqtaldy. Jóndeý jumystary bıyl maýsym aıynyń ortasynda bastalǵan bolatyn, dep habarlaıdy QazAqparat «QazAvtoJol» AQ baspasóz qyzmetine silteme jasap. .

Jolshylar tasjolǵa asfaltbeton jabynyn tóseý jumystaryn júrgizdi. Qaýipsiz jáne kedergisiz jol qozǵalysyn qamtamasyz etý maqsatynda Aqsý qalasyndaǵy avtomobıl joldarynyń boıy jaryqtandyrylyp, jol jıekteri salyndy. Sonymen qatar demalys alańdarynda kún sáýlesinen qýat alatyn shamdar ornatylyp, jolaqtar syzyldy.

Uzyndyǵy 10 shaqyrym ýchaskeniń boıynda 6 jaryqdıodty jol belgileri ornatyldy. Júrgizýshilerdiń qolaılyǵy úshin 2 avtopavılon, 3 demalys alańy jóndelip, jańa dárethana ornatyldy. Ýchaskedegi jumysqa 22 bilikti maman men 16 jol-qurylys tehnıkasy jumyldyryldy.