Pavlodarda jol-kólik apatynan eki júrgizýshi qaza tapty

PAVLODAR. KAZINFORM — Polıtsııa qaıǵyly jaıt boıynsha qylmystyq is qozǵady. Oqıǵanyń mán-jaıy men sebepteri tergeý barysynda anyqtalatyn bolady. 

«Pavlodar — Omby» tas jolynda eki jeńil kólik betpe-bet soǵysyp, saldarynan ekeýiniń de júrgizýshileri opat boldy.

— Oqıǵa 27 jeltoqsan kúni «Pavlodar — Omby» avtojolynyń Bobrovka aýyly mańynda bolǵan. Toyota Vitz markaly avtokóliktiń júrgizýshisi kóktaıǵaq jaǵdaıynda kólikti basqara almaı, qarsy qozǵalys jolaǵyna shyǵyp ketip, Hyundai Accent avtokóligimen betpe-bet soqtyǵysqan. Atalǵan jol-kólik oqıǵasy saldarynan eki júrgizýshi oqıǵa ornynda qaza taýyp, bir jolaýshy aýrýhanaǵa jetkizildi. Atalǵan derek boıynsha qylmystyq is qozǵaldy — dep habarlady óńirlik polıtsııa departamentinen.

Oblystyq densaýlyq saqtaý basqarmasynyń habarlaýynsha, mert bolǵandardyń ekeýi de áıel. Onyń biri oqıǵa ornynda qaza tapsa, ekinshisi Tereńkól aýdanyndaǵy aýrýhanada kóz jumǵan.

Avtokólikter arnaıy aıypturaqqa qoıylǵan. Qaıǵyly jaıttyń mán-jaıy men sebepteri tergeý barysynda anyqtalatyn bolady.

Tártip saqshylary kópshilikti jol qozǵalysy qaǵıdalaryn qatań saqtaýǵa, belgilengen jyldamdyq rejımin asyrmaýǵa, kólik quraldarynyń tehnıkalyq jaı-kúıin baqylaýǵa jáne aýa raıy jaǵdaılaryn eskerýge shaqyrady.

Eske sala keteıik, Almaty-Óskemen trassasynda avtobýs pen júk kóligi soqtyǵysyp, júrgizýshi qaza boldy.