Pavlodarda jol apatyna kináli júrgizýshi jalǵan qyzmettik qujat kórsetken

NUR-SULTAN. QazAqparat – Kóligimen basqa avtomobıldi soǵyp, sodan soń sybaılas jemqorlyqqa qarsy kúres vedomstvosynyń qyzmetkeri retinde jalǵan qyzmettik qujat kórsetken kúdikti ustaldy, dep habarlaıdy QazAqparat QR Sybaılas jemqorlyqqa qarsy is-qımyl agenttigine silteme jasap.

«Áleýmettik jelilerge monıtorıng júrgizý barysynda beıtanys azamat aq tústi memlekettik nómiri «151OTA01» Toıota Kamrı 55 avtokóligimen jol-kólik apatyn jasaǵannan keıin, sybaılas jemqorlyqqa qarsy qyzmettiń aǵa ofıtseri Arman Serikuly Imanbaevtyń atynan № 018 qyzmettik kýáligin kórsetip, sybaılas jemqorlyqqa qarsy vedomstvo qyzmetkeri retinde ózin tanystyrǵan beınerolık alyndy», delingen habarlamada.

Beınerolık avtory onyń mas ekenin aıtady. Tekserý oqıǵanyń 21 qarashada Pavlodar qalasynda Sharbaqty kópiriniń janynda bolǵanyn anyqtady.

«Atalǵan er adamdy polıtsııa qyzmetkerleri ustap, QR QK 190-babynyń 4-bóliginde kózdelgen aýyr qylmys jasaǵany úshin (alaıaqtyq) halyqaralyq izdeýde júrgen adam retinde tanydy. Tekserý kezinde polıtseıler sybaılas jemqorlyqqa qarsy qyzmettiń jalǵan qyzmetkeriniń avtokóligin jáne ózin tintý kezinde joǵaryda atalǵan A.S.Imanbaevtyń atyndaǵy qyzmettik kýálik tappady. Ustalǵan azamattyń túsindirýi boıynsha ol kýálikti órtep jibergen», delingen habarlamada.

Qazirgi ýaqytta ustalǵan azamat Almaty qalasy Polıtsııa departamentniń ýaqytsha ustaý ızolıatoryna qamaldy. Atalǵan tulǵanyń osylaısha quqyq qorǵaý organdarynyń qyzmetkeri retinde ózin tanystyrýy alǵashqy ret emes. 2011 jyly osyǵan uqsas áreketteri úshin (ózin QR ІІM qyzmetkeri retinde kórsetken) sottalǵan.

21 qazanda Sybaılas jemqorlyqqa qarsy is-qımyl agenttigi qyzmetkerleriniń qyzmettik kýáliginiń jańa úlgisimen tanystyrdy.

«Birinshiden, sybaılas jemqorlyqqa qarsy is-qımyldyń jańa úlgisin parasattylyq ıdeologııasynyń negizinde ilgerilete otyryp, ótkenniń nyshandary men rámizderinen arylý óte mańyzdy. «Korochka» túrindegi qyzmettik kýálikter qoǵamda jaǵymsyz qabyldanatyny eshkimge qupııa emes, ony teris paıdalaný jáne bassyzdyqpen baılanystyrylady. Ekinshiden, bul óte únemdi jáne fýnktsıonaldy. Jańa kýálikterdi ázirleý quny eski úlgige qaraǵanda eki jarym ese arzan. Agenttiktiń ákimshilik ǵımarattaryna sol arqyly kirýge bolady. Úshinshiden, barynsha senimdi, 6 qorǵanysh dárejesi bolǵandyqtan olardyń jalǵan túrin jasaý táýekeli joq. Tórtinshiden, bekitilgen format halyqaralyq standarttarǵa tolyq sáıkes keledi. Ekonomıkalyq yntymaqtastyq jáne damý uıymy elderinde plastık ID-kartalardy polıtsııa, arnaýly qyzmetterdiń jáne memlekettik organdardyń qyzmetkerleri burynnan paıdalanady», delingen habarlamada.

Baspasóz qyzmetiniń málimetinshe, jańa úlgidegi qyzmettik kýálikti úı jaǵdaıynda ázirleý múmkin emes. Osy rette, agenttik Sybaılas jemqorlyqqa qarsy vedomstvo qyzmetkerleriniń qyzmettik kýáligin teris maqsatta paıdalanǵan jaǵdaıda 1424 Call-center-ge habarlasýdy suraıdy.