Pavlodarda jol apatynan eki júrgizýshi qaza tapty

PAVLODAR. KAZINFORM - Taǵy bir jolaýshy aýrýhanaǵa jatqyzyldy. Polıtsııa jol-kólik oqıǵasy boıynsha sotqa deıingi tergeý júrgizip jatyr.

13 tamyzda Belov-Qalqaman avtojolyndaǵy Solvetka aýylynyń mańynda Toıota Ipsým jáne Toıota Kamrı markaly eki avtokólik soqtyǵysqan. Apat saldarynan eki júrgizýshi de sol jerde kóz jumdy. Bir jolaýshy aýrýhanaǵa jetkizildi,-dep habarlady óńirlik polıtsııa departamentiniń baspasóz qyzmetinen.

Óńirlik polıtsııa departamenti kisi ólimimen aıaqtalǵan qaıǵyly jol-kólik oqıǵasy boıynsha sotqa deıingi tergeýdi bastady.

Oblystyq densaýlyq saqtaý basqarmasynyń málimetinshe, zardap shekken jolaýshy 19 jasta, Astana qalasynyń turǵyny. 

- Oqıǵa kezinde basy, keýde tusy, aıaǵy jaraqattanyp, súıekteri synǵan. Ol jedel járdem kóligimen Aqsý qalasyna jetkizilip, jansaqtaý bólimine jatqyzyldy. Jaǵdaıy aýyr, ókpesine jasandy demaldyrý apparaty jalǵanǵan. Barlyq medıtsınalyq kómek kórsetilip jatyr,-dep málimdedi basqarmadan.

Polıtsııa departamenti mundaı qaıǵyly oqıǵalardyń aldyn alý úshin jol qozǵalysyna qatysýshylarǵa jyldamdyq rejımin saqtaýdy eskertip otyr. Ásirese kólik kóp júretin jerlerde jyldamdyqty shamadan tys asyrmaý, abaı bolý, kólik quralynyń tehnıkalyq jaǵdaıyn baqylaý mańyzdy ekenin eske salady.

Eske sala keteıik, Batys Qazaqstanda 3 avtokólik soqtyǵysyp, júrgizýshi kóz jumdy.