Pavlodarda jol apatynan bir adam mert bolyp, taǵy jeteýi jaraqat aldy
PAVLODAR. KAZINFORM - Pavlodar – Kenjekól avtojolynda 4 jeńil kóliktiń soqtyǵysýynan bir adam qaıtys boldy. Polıtsııa atalǵan oqıǵa boıynsha qylmystyq is qozǵalǵanyn habarlady.
Jol apaty kezinde ÝAZ Patriot, Audi 100, BMW jáne Lada Priora avtokólikteri soqtyǵysqan.
Pavlodar qalalyq №1 aýrýhanasyna alty er adam jetkizilgen. Olardyń barlyǵy 2003-2006 jyldar aralyǵynda týǵan.
- Zardap shekkender túrli jaraqat alǵan. Bireýine ambýlatorııalyq kómek kórsetilgen. Úsh adam jansaqtaý bóliminde, taǵy bir naýqas polıtravma bóliminde, bireýi travmatologııa bóliminde em alyp jatyr. Al taǵy bir jaraqat alǵan adam medıtsınalyq kómekten bas tartqan. Barlyq naýqastarǵa qajetti medıtsınalyq kómek kórsetilip, tıisti tekserýler júrgizilip jatyr, - dep habarlady óńirlik densaýlyq saqtaý basqarmasynan.
Oblystyq polıtsııa departamenti jazataıym oqıǵa saldarynan bir adam qaıtys bolǵanyn málim etti.
- Atalǵan jol-kólik oqıǵasyna baılanysty polıtsııa qylmystyq is qozǵady. Oqıǵanyń mán-jaıy men sebepteri tergeý barysynda anyqtalady, – dep habarlady departamentten.
Tártip saqshylary jol-kólik oqıǵalarynyń aldyn alý úshin júrgizýshiler men ózge de jol qozǵalysyna qatysýshylardy jol erejesin qatań saqtaýǵa shaqyrady. Ásirese kólik qozǵalysy qarqyndy ýchaskelerde belgilengen jyldamdyq rejımin saqtaý qajettigin eskertedi.
Eske sala keteıik, Aqtaý–Beıneý tasjolyndaǵy jol apatynan tórt adam mert boldy.
