Pavlodarda joǵary jyldamdyqpen kele jatqan kólik júrgizýshisi mas bolyp shyqty
PAVLODAR. QazAqparat - Pavlodarlyq polıtseıler ishimdikke toıyp alyp júıtkigen mas júrgizýshini izinen qýyp jetip ustady, dep habarlaıdy Ravlodarnews.kz.
Aýyl turǵynyna qatysty QR ÁQBtK-niń 608 jáne 612-baptary boıynsha ákimshilik is qozǵalyp, avtokólik aıyppul turaǵyna qoıyldy.
- 10 qyrkúıek kúni saǵat 17.45 mınýt shamasynda oblystyq departamenttiń patrýldik polıtsııa rotasynyń ekıpajy aǵa leıtenanttar Jandáýlet Ramazanov pen Alısher Latıpov Omby tas jolynda, Dostyq kentiniń mańynda joǵary jyldamdyqpen júıtkip kele jatqan «VAZ 2107» avtokóligin baıqaǵan. Júrgizýshi polıtsııanyń «toqta» degen talaptaryn elemeı odan saıyn jyldamdyqty qosyp, Pavlodar qalasyna qaraı júıtkigen. Mundaı jaǵdaıda kútýge bolmaıtyn edi. Sebebi, úlken jyldamdyqpen qozǵalatyn kólikten zardap shegý qaýpi boldy. Ekinshi avtopatrýl dereý onyń sońyna tústi. Kólik Mıchýrın aýylynyń mańynda ustaldy, - deıdi polıtsııa polkovnıgi, departament bastyǵy Nurlan Másimov.
Alkogolge toıyp alǵan 30 jastaǵy aýyl turǵyny serýendeýge bel býyp, ákesiniń kóligin minip ketkeni anyqtaldy. Buǵan qosa, onyń eshqashan kólik quralyn basqarýǵa quqyǵy bolmaǵan.
Materıaldar sotqa sheshim qabyldaý úshin jiberildi.
Aıta keterligi, 2020 jyldyń basynan beri Pavlodar oblysynda mas júrgizýshiler jasaǵan 14 jol-kólik oqıǵasy tirkelip, saldarynan 2 adam kóz jumǵan jáne 19-y jaraqat aldy.
Sondaı-aq polıtsııa 734 júrgizýshini mas kúıinde kólik rýline otyrǵany úshin ustaǵan.
