Pavlodarda joǵary laýazymdy sheneýnik 50 myń teńgelik syılyq alǵany úshin 1 mln teńge aıyppul arqalady
PAVLODAR. KAZINFORM - Pavlodarda «Azamattarǵa arnalǵan úkimet» memlekettik korporatsııasy oblystyq fılıaly basshysynyń burynǵy mindetin atqarýshy men almatylyq kásipkerge qatysty sot úkimi shyqty.
Qylmystyq is Pavlodar qalasynyń qylmystyq ister jónindegi aýdanaralyq sotynda qaraldy. Sottalýshylar oryndyǵyna 63 jastaǵy burynǵy sheneýnik pen Almatydan kelgen kásipker otyrdy.
Іs materıaldaryna súıensek, oqıǵa 2025 jyldyń jeltoqsan aıynda bolǵan. Almatylyq kásipker jer ýchaskeleriniń kadastrlyq qujattaryn jedel tirkep, ondaǵy arnaıy belgini alyp tastaý úshin fılıal basshysynyń mindetin atqarýshyǵa júgingen. Laýazymdy tulǵa ótinishti tez arada oryndap bergenimen, qyzmettiń «tegin jasalmaıtynyn» tuspaldap jetkizgen.
Ótinishi oryndalǵan soń kásipker sheneýniktiń qyzmettik kabınetine kelip, jumys ústeline «Frantsýz úıi» parfıýmerııalyq dúkeniniń 50 000 teńgelik syılyq sertıfıkatyn qoıǵan.
Sotta «Azamattarǵa arnalǵan úkimet» fılıalynyń burynǵy basshysy para alǵany, al kásipker para bergeni úshin aıyptaldy. Eki aıyptalýshy da taǵylǵan aıypty tolyq kólemde moıyndady.
Sot sheshimimen «Azamattarǵa arnalǵan úkimet» fılıaly basshysynyń burynǵy m.a. 1 mıllıon 250 myń teńge kóleminde aıyppul arqalady. Al almatylyq kásipkerge 750 myń teńge aıyppul salyndy.
Eske sala keteıik, Aqtóbede memlekettik kirister basqarmasynyń bólim basshysy para alǵany úshin sottaldy.
