Pavlodarda joǵalyp ketken stýdent Óskemennen tabyldy
Qalalyq polıtsııa basqarmasy baspasóz qyzmetiniń málimetine súıensek, tártip saqshylary pavlodarlyq áriptesterinen 17 jastaǵy jigittiń joǵalǵany týraly habar alǵan.
Kólik jáne kommýnıkatsııa kolledjiniń dırektory 15 aqpanda saǵat 13.32-de polıtsııaǵa habarlasyp, stýdenttiń habar-osharsyz ketkenin aıtqan. Belgili bolǵandaı, ol keter aldynda grýppalastaryna qoshtasý hatyn jazyp ketken. Dırektor stýdent Óskemenge ketýi múmkin degen boljam jasady.
Polıtsııa qyzmetkerleri joǵalǵan jigittiń dostarymen jáne tanystarymen sóılesip, onyń Óskemenge jetý úshin taksıge tapsyrys bergenin anyqtady. Stýdent áleýmettik jelilerdegi dostarynyń habarlamalaryna, qońyraýlaryna jaýap bermegen.
«Pavlodarlyq áriptester habarlasqannan keıin kámeletke tolmaǵan balany izdeýge barlyq jeke quram jumyldyryldy. Sonyń nátıjesinde, ony kóp uzamaı taptyq. Stýdent Qabanbaı batyr kóshesinde júrgen. Ol munda óziniń tanysyna kelgen», - dedi basqarma bastyǵy Andreı Mýla.