Pavlodarda joǵalyp ketken 12 jasar qyz bireýdiń garajynda esin jıǵan
PAVLODAR. QazAqparat – 22 naýryzda shamamen saǵat 16:00-de úıinen qoqys tastaýǵa shyqqan 12 jasar Ksenııa Zorına sol kúni úıine oralmady. Pavlodar qalasyndaǵy «VITA» eriktileri shuǵyl túrde qyz balany izdeýge shyqqan. Іzdeý sharalaryna polıtsııa qyzmetkerleri men kınologter jumyldyryldy. Qyz bala din aman tabyldy. Aıtýynsha, kóshede esinen tanǵan ol bireýdiń garajy álde jertólesinde esin jıdy, dep habarlaıdy QazAqparat.
Bolǵan oqıǵanyń mán-jaıymen Pavlodardyń «VITA» eriktiler toby Instagram-daǵy paraqshasynda bólisti.
12 jasar Ksenııa Zorına saǵat 16:00-de úıinen qoqys tastaý úshin dalaǵa shyǵyp ketken. Onyń úıi Korolenko kóshesinde ornalasqan. Qyz bala sodan úıine oralmady. Ony izdeýge eriktiler, polıtseıler men kınologter shyqty. Birneshe saǵattan soń qyz bala din aman tabylǵan.
«Onyń aıtýynsha, ol kóshede esinen tanyp, bireýdiń garajy álde jertólesinde esin jıdy. Ol qatty jylady. Qaltyraǵan, ústi-basy sý, qarda jatqan eken. Qasynda eshkim bolǵan joq. Garaj nemese jertóleden ózi shyǵyp ketken. Qyz bala qalada jalǵyz júre almaıdy. Biraq tanys joldy kórip, sol jolmen júre bergen. Biz qyz balanyń aýlasyna baryp taǵy qarasaq, bir kezde ózin baıqadyq. Sol kúni keshke ony jedel járdem alyp ketti. Ata-anasy bizben ázirge habarlasqan joq», - dep baıandady «VITA» eriktileri.
Eriktiler q yz balanyń joǵalýynyń mán-jaıy men onyń shynymen qaıda bolǵany anyqtalatyn aıtty.
