Pavlodarda jylý maýsymyna daıyndyq: JEO-3-te úsh qazandyq kúrdeli jóndeýden ótti
ASTANA. KAZINFORM — Pavlodar JEO-3 stantsııasynda jylytý maýsymyna daıyndyq aıasyndaǵy jóndeý jumystary aıaqtaldy. Úsh qazandyq, eki týrboagregat pen tútin murjasy kúrdeli jóndeýden ótti. Bul týraly Energetıka mınıstrligi málim etti.
Jylytý maýsymyna daıyndyq aıasynda QR Energetıka mınıstrliginiń Memlekettik energetıkalyq qadaǵalaý jáne baqylaý komıteti elimizdiń energetıkalyq nysandaryndaǵy jóndeý jumystarynyń barysyna baqylaýdy jalǵastyryp jatyr. Bul rette jóndeý jumystarynyń ýaqytyly oryndalýyna, jabdyqtardyń tehnıkalyq jaı-kúıine jáne tutynýshylardy energııamen senimdi qamtamasyz etýge erekshe nazar aýdarylady.
Júıelik operatordyń josparyna sáıkes, bıyl elimizdiń elektr stantsııalarynda 9 energoblokqa, 55 qazandyq agregatqa jáne 51 týrboagregatqa kúrdeli jóndeý júrgizý josparlanǵan. Búgingi tańda 8 energobloktyń, 49 qazandyq agregattyń jáne 32 týrboagregattyń kúrdeli jóndeýi aıaqtaldy.
Atap aıtqanda, «PAVLODARENERGO» AQ Pavlodar JEO-3 stantsııasynda josparǵa sáıkes jóndeý naýqany tolyq kólemde aıaqtaldy. Pavlodar tutynýshylaryn jylý jáne elektr energııasymen senimdi qamtamasyz etý maqsatynda № 1, 3 jáne 5 qazandyq agregattaryna, № 3 jáne 5 týrboagregattaryna kúrdeli jóndeý júrgizilip, sondaı-aq № 1 tútin murjasy jóndeldi.
Qazirgi ýaqytta stantsııada bes qazandyq agregat pen bes týrboagregat jumys istep tur. Olar tutynýshylarǵa jylý jáne elektr energııasyn óndirýdi qamtamasyz etedi.
Jóndeý naýqanynyń aıaqtalýy Pavlodar JEO-3 jabdyqtarynyń senimdi jumys isteýine jáne 2026–2027 jyldardaǵy jylytý maýsymynda tutynýshylardy turaqty energııamen qamtamasyz etýge múmkindik beredi.
