Pavlodarda jylý maýsymy men energetıkalyq nysandardyń jaǵdaıy tekserildi
ASTANA. KAZINFORM — QR Premer-mınıstriniń birinshi orynbasary Roman Sklıar Pavlodar oblysyna jasaǵan jumys sapary barysynda óńirdiń negizgi energetıkalyq, ónerkásiptik jáne áleýmettik nysandaryn aralady, dep habarlaıdy Úkimettiń baspasóz qyzmeti.
Roman Sklıar Ekibastuz qalasyndaǵy jylý berý maýsymynyń ótý barysymen tanysty. Oblys ákimi Asaıyn Baıhanov jylýmen jabdyqtaý jelilerin jańǵyrtý jumystarynyń nátıjesinde jylý berý maýsymy qalypty rejımde ótip jatqanyn baıandady. 2023-2025 jyldary jalpy somasy 11,3 mlrd teńgege JM-2 jáne JM-7 jylý magıstraldary qaıta jańartyldy, onyń ishinde 6,7 mlrd teńge respýblıkalyq bıýdjetten bólindi. Gıdravlıkalyq synaqtardyń qorytyndysy boıynsha 13,5 shaqyrym jeli jóndelip, 341 aqaý joıyldy. Jergilikti bıýdjetten qosymsha 1,7 mlrd teńge bólinip, 19 shaqyrym jeli jóndeldi.
Sondaı-aq birinshi vıtse-premer Ekibastuz JEO jańǵyrtý jumystarynyń barysymen tanysty. «Energy Solution Center» JShS bas dırektory Aıdarbek Qystaýbaev negizgi jabdyqtardy jóndeýdiń keshendi baǵdarlamasynyń júzege asyrylýy týraly baıandady.
2023-2025 jyldary munda № 5-9 energetıkalyq qazandyqtar men № 11-15 sý jylytý qazandyqtaryna kúrdeli jáne aǵymdaǵy jóndeý jumystary júrgizildi. Al № 6-8 qazandyq agregattarynda negizgi jáne keńeıtilgen aǵymdaǵy jóndeý jumystary kezeń-kezeńimen jabdyqtardy jańartýmen qatar atqaryldy. Bul jumystar Úkimet rezervi men oblys ákimdiginiń qarajaty esebinen júzege asyryldy.
2026-2027 jyldary ákimshilik-turmystyq keshen salý, ekologııalyq qaýipsizdikti qamtamasyz etý úshin kúl úıindilerin qaıta jańǵyrtý jáne salý, sondaı-aq generatsııalaý qýattaryn ulǵaıtý josparlanǵan.
Tsıfrlandyrý men ónerkásiptik qaýipsizdikti arttyrý máselelerine erekshe nazar aýdaryldy. 2025 jyly stantsııada qyzmetkerler úshin «aqyldy kaskalar» engizildi, al 2026 jyly eńbek qaýipsizdigin baqylaýdy kúsheıtý maqsatynda beınejetondardy engizý josparlanyp otyr. Roman Sklıar tsıfrlyq sheshimderdi óndiristik baqylaý júıesine biriktirip, olardy tájirıbede qoldanýdy qamtamasyz etýdi tapsyrdy.
Sonymen qatar Premer-mınıstrdiń birinshi orynbasary «Railways Systems KZ» holdınginiń óndiris ornynda bolyp, jalpy ınvestıtsııa kólemi 500 mlrd teńgege jýyq ($976 mln), jylyna 1 mln tonnaǵa deıin joǵary sapaly bolat óndiretin zamanaýı elektrometallýrgııalyq zaýyttyń qurylysymen tanysty. Zaýytty iske qosý 2028 jylǵa josparlanǵan jáne 1000 astam jańa jumys orny ashylady. Ónim ishki naryqpen qatar eksportqa da baǵyttalady: ónimniń 40%-ǵa jýyǵy TMD elderi men Eýroodaqqa jiberiledi.
Pavlodar JEO-2 ortalyǵynda oblys ákimi Asaıyn Baıhanov 2025-2026 jylǵy jylý berý maýsymynyń barysy týraly baıandady. Oblys ortalyǵyn sapaly jylýmen qamtamasyz maqsatynda uzyndyǵy 5,9 shaqyrym bolatyn JM-20A jylý magıstrali salyndy, jylý jelilerinde gıdravlıkalyq synaqtar júrgizilip, jalpy uzyndyǵy 7,2 shaqyrym bolatyn 343 aqaý joıyldy. 2026 jyly jalpy quny 4,8 mlrd teńgege 21 shaqyrym kvartalishilik jelilerdi qaıta jańǵyrtý jáne 8,1 shaqyrym magıstraldyq jylý jelilerine aǵymdaǵy jóndeý jumystaryn júrgizý josparlanǵan.
«Pavlodarenergo» AQ bas dırektory Oleg Şemel 2025 jyly JEO-2 ortalyǵynda negizgi jabdyqtarǵa júrgizilgen jóndeý jumystary týraly esep berdi. 2026-2027 jyldary stantsııada jalpy quny 17,2 mlrd teńgege qazandyqtar men týrboagregattarǵa kúrdeli jóndeý, kúl tazalaý júıeleri men jaryqtandyrǵyshty qaıta jańǵyrtý, zamanaýı tsıfrlyq sheshimder men IT-júıelerdi engizý josparlanǵan. Jalpy quny 18,6 mlrd teńgege osyndaı jumystar JEO-3 ortalyǵynda da júrgizý qarastyrylǵan.
Roman Sklıar jóndeý naýqany men ınvestıtsııalyq baǵdarlamalardyń sapaly oryndalýyn, merzimderdiń saqtalýyn, tehnologııalyq jáne ekologııalyq kórsetkishterdiń oryndalýyn qatań baqylaýdy, sondaı-aq jylý berý maýsymynyń senimdi ótýin qamtamasyz etýdi tapsyrdy.
Jumys sapary barysynda birinshi vıtse-premer «Pavlodar munaı-hımııa zaýyty» JShS de bardy. PMHZ aýyr gazoılderdi óńdeý jáne ashyq munaı ónimderiniń shyǵymyn arttyrýǵa baǵyttalǵan SENIM-D jobasyn qosa alǵanda, aýqymdy jańǵyrtý jobalaryn júzege asyrýda. Sondaı-aq kásiporynda jasandy ıntellekt sheshimderin qoldana otyryp, avtomattandyrý jáne tsıfrlandyrý júıelerin engizý boıynsha master-jospar ázirlengen. Zaýyt basshylyǵyna óndiristiń tıimdiligi men tehnologııalyq jaraqtandyrylýyn arttyrý jumystaryn jalǵastyrý tapsyryldy.
Jumys saparynyń sońynda Roman Sklıar Pavlodar qalasyndaǵy 2025 jylǵy 1 qyrkúıekte «Bolashaq mektebi» memlekettik baǵdarlamasy aıasynda ashylǵan № 48 jalpy bilim beretin mekteptiń qyzmetimen tanysty. Mektep 1200 oqýshyǵa arnalǵan jáne zamanaýı tsıfrlyq ári ınklıýzıvti ınfraqurylymmen jabdyqtalǵan. Birinshi vıtse-premer balalardyń jan-jaqty damýy úshin teń jáne qolaıly jaǵdaı jasaýdyń mańyzdylyǵyn atap ótti.
Jumys sapary Pavlodar oblysynyń turaqty áleýmettik-ekonomıkalyq damýyna baǵyttalǵan energetıka, ónerkásip jáne áleýmettik ınfraqurylym salalaryndaǵy negizgi jobalardyń iske asyrylý barysyn keshendi túrde baǵalaýǵa múmkindik berdi.
Budan buryn Roman Sklıar sıngapýrlyq kompanııa ókilderimen Pavlodar oblysynda ónerkásip parkiniń qurylysyn talqylaǵanyn jazǵanbyz.