Pavlodarda jylytý maýsymy bastaldy: Qalǵan óńirler daıyn ba
ASTANA. KAZINFORM — Búgingi Úkimet otyrysynda jylytý maýsymyna daıyndyq máselesi kezekten tys qaraldy. Energetıka mınıstri Erlan Aqkenjenov óńirlerdiń daıyndyǵy men jańǵyrtý jumystary týraly baıandady.
Mınıstrdiń aıtýynsha, 14 qyrkúıekten bastap Pavlodar oblysynda jylytý maýsymy bastaldy. Bul jumystardy soltústik jáne shyǵys óńirlerde aýa raıynyń kórsetkishterine qaraı 1 qazanǵa deıin bastaý kútilýde.
— Jalpy jóndeý jumystary bekitilgen kestege sáıkes júrgizilip jatyr. Energııa kózderinde jylytý maýsymyn bastaý úshin qajetti otyn qory jáne negizgi jabdyqtar bar. 17 myń shaqyrym elektr berý jelileri tolyq jóndeldi, 9 qosalqy stantsııadaǵy jumystar aıaqtalý satysynda tur, — dedi Energetıka mınıstri.
Sondaı-aq jospardaǵy 377 shaqyrym jylý jelileriniń jalpy 97% nemese 366 shaqyrymy daıyn.
— Óz kezeginde daıyndyq boıynsha birqatar óńir Energetıka mınıstrligi men Úkimettiń erekshe baqylaýynda. Máselen, ótken aptada Sátbaev qalasynda jylý magıstraliniń jańǵyrtý tolyq aıaqtaldy. Qazirgi ýaqytta jelini tazalaý jáne qysymmen synaý jumystary júrgizilýde, — dedi Erlan Aqkenjenov.
Petropavl qalasynyń jylý magıstraldary boıynsha daıyndyq 95% kórsetken. Barlyq jumysty aptanyń sońyna deıin aıaqtaý josparlanǵan.
— Semeıdegi úsh joba boıynsha ótken aptada jumystardyń taǵy 15% oryndalyp, jalpy jospardyń 70% aıaqtaldy. Alaıda sý tartý qurylǵylary men jylý almastyrǵyshtar 26 qyrkúıekte ǵana jetkiziledi. Osyǵan baılanysty óńir ákimdigine qajetti jabdyqtardy jetkizýdi jedeldetý tapsyryldy, — dedi sala mınıstri.
Stepnogorsk qalasynda ótken aptada jylý magıstralin jańǵyrtý jumystarynyń 24% oryndalyp, jeliniń jalpy daıyndyǵy 76%-ǵa jetti. Jumystardy 25 qyrkúıekke deıin aıaqtaý josparlanǵan.
— Osyǵan baılanysty óńirlerdegi jóndeý jumystaryn qysqa merzimde aıaqtaý qajet. Mınıstrlik jóndeý jumystarynyń barysyn jergilikti jerlerge baryp, kúndelikti baqylaýda ustaıdy, — dedi Erlan Aqkenjenov.
Eske sala ketsek, jylý berý maýsymyna daıyndyq barysy 16 qyrkúıekte Premer-mınıstr Oljas Bektenovtiń tóraǵalyǵymen ótken keńeste qaralǵan bolatyn.
Petropavlda 80-nen astam kópqabatty úı jylytý maýsymyna áli daıyn emes.
