Pavlodarda jylytý kezeńindegi qaýipsizdik erejelerin saqtamaǵan 5 adam qaza tapty

PAVLODAR. KAZINFORM - Ertis-Baıan óńirinde jylytý maýsymy bastalǵaly turǵyn úı sektorynda 25 órt oqıǵasy tirkelgen. Saldarynan 5 adam kóz jumyp, 2 adam zardap shekken. Bul týraly Pavlodar oblystyq tótenshe jaǵdaılar departamentinen habarlady.

Jazataıym oqıǵalardyń kóbi órt qaýipsizdigin saqtamaý saldarynan bolǵan.

Turǵyn úı sektoryndaǵy órtterdiń negizgi sebepteri - elektr jabdyqtaryn montajdaý, peshti qaptaý, paıdalaný kezindegi tehnıkalyq qaǵıdalardy eskermeý, órt qaýipsizdigi erejelerin buzý. Jylytý kezeńi bastalǵannan beri oblystyń turǵyn úı sektorynda 25 órt bolyp, 2 adam qaza tapty, 1 adam jaraqat aldy. Sondaı-aq kómirtegi totyǵymen ýlanǵan 3 adam qaza taýyp, 1 adam zardap shekti,-dep habarlady óńirlik tótenshe jaǵdaılar departamentinen. 

Osyǵan baılanysty mekeme qyzmetkerleri jylytý kezeńinde órt qaýipsizdiginiń aldyn alý sharalaryn kúsheıtip jatyr. Respýblıkalyq órt qaýipsizdigi aılyǵy aıasynda Pavlodar óńirinde órttiń aldyn alý boıynsha aýqymdy reıdter uıymdastyryldy. Turǵyn úı sektoryn aralaý barysynda turǵyndarmen túsindirý jumystary júrgizildi. Halyqtyń áleýmettik osal toptaryna, jalpy sany 1233 úıge jáne zeınetkerlerge erekshe kóńil bólindi. Mamandar jalpy sany 54 myńnan astam turǵyn úıdi aralap shyqqan.

Qazirgi ýaqytta jergilikti atqarýshy organdar men úkimettik emes uıymdar esebinen 687 ýly gaz datchıgi ornatylǵan. 98 úıde pesh murjasyn tazartý jumystary júrgizilip, 87 úıde pesh aldy metall paraqtary ornatyldy.

Eske sala keteıik, Pavlodarda jer úı órtenip, 40 jastaǵy er adam kóz jumdy.

Sondaı-aq 34 jasar áıel ıis tıip kóz jumdy.