Pavlodarda jyl basynan esirtkige qatysty 225 qylmys anyqtalǵan

PAVLODAR. KAZINFORM - Onyń ishinde 100 qylmys «aýyr» jáne «asa aýyr» sanattarǵa jatady. Aınalymǵa jiberilmegen esirtki jáne psıhotroptyq zattardyń kólemi 423 kılogramdy qurap otyr.

Óńirlik polıtsııa departamenti basshysynyń orynbasary Bolat Nurseıitov bıylǵy 10 aıdyń qorytyndysy boıynsha esirtkige qatysty 225 quqyq buzýshylyq anyqtalǵanyn habarlady. Onyń ishinde 100 qylmys «aýyr» jáne «asa aýyr» sanattaryna jatady. Tárkilengen esirtki jáne psıhotroptyq zattardyń kólemi 423 kılogramdy quraǵan.

- Bıyl «Kıberqadaǵalaý» júıesimen 75 ınternet-resýrsy jáne 115 OLX marketpleısi buǵattaldy. Jedel-tergeý is-sharalaryn júrgizý kezinde quramynda gashısh maıy bar 3500 kapsýla tárkilendi. 2024 jyldyń 10 aıy ishinde qoǵamda esirtkige sanaly túrde qarsy kózqarasty qalyptastyrý maqsatynda 1500-den astam profılaktıkalyq is-sharalar ótkizildi. Olarǵa 143 myńnan astam mektep oqýshylary, sondaı-aq, kolledjder men joǵary oqý oryndarynyń stýdentteri qatysty, - deıdi Bolat Nurseıitov.

Densaýlyq saqtaý basqarmasynyń basshysy Ánýar Buırashevtyń málimetinshe, óńirde esirtkige táýeldiler esebinde 1876 adam tur. Májbúrli bólimshedegi statsıonarlarda 33 adam, erikti bólimshede 196 adam emdeldi.

Ońaltýdyń úshinshi kezeńi Mıchýrın aýylynyń «Asar» bólimshesinde júrgiziledi. 2023 jylǵy jeltoqsannan bastap medıtsınalyq kýálandyrý kabınetterinde 8 jolaqty synaqtar júrgiziledi. Olar morfın, marıhýana, tramadol, amfetamın, mefedron, tropıkamıd, mıtılen-dıoksıpırovaleron, sıntetıkalyq kannabınoıdtardy anyqtaı alady. 

Buǵan qosa bıyl 282 mln teńgege 2 zamanaýı gaz hromatografy satyp alynǵan, qurylǵy jańa esirtki qosyndylaryn anyqtaýǵa múmkindik beredi.