Pavlodarda jyl basynan beri 32 adam brýtsellez aýrýyn juqtyrǵan

PAVLODAR. KAZINFORM - Pavlodar oblysyndaǵy turǵyndar arasynda brýtsellez aýrýyn juqtyrý jaıttary azaımaı tur. Jyl basynan brýtsellez dertin juqtyrýdyń 32 deregi tirkelgen.

Mamandardyń sózinshe, oblysta asa qaýipti aýrýlar boıynsha epıdemıologııalyq jaǵdaı turaqty.

Jyl basynan syrttan asa qaýipti jáne karantındik ınfektsııalardyń ákelingen jaǵdaılary tirkelgen joq.

- Jyldyń alǵashqy 9 aıynda oblysta brýtsellez juqtyrýdyń 32 jaǵdaıy tirkeldi. Bul 100 myń turǵynǵa shaqqanda 4,2 jaǵdaıdy qurap otyr. Ótken jyldyń uqsas kezeńinde 33 jaǵdaı tirkelgen. Brýtsellez aýrýynan saqtaný úshin mal basyn júıeli túrde tekserip, vaktsınatsııalaý júrgizgen jón. Aýrý mal anyqtalsa oqshaýlap, oǵan kútim jasaý kezinde qaýipsizdik sharalaryn saqtaý kerek. Durys qaınatylmaǵan, qýyrylǵan etti, shıki sútti, óńdelmegen súzbeler men irimshikterdi jeýge bolmaıdy. Et nemese sút satyp alǵanda, sapa men qaýipsizdikti rastaıtyn qujattardy talap etken abzal, - deıdi Pavlodar oblysynyń sanıtarııalyq-epıdemıologııalyq baqylaý departamenti basshysynyń orynbasary Zámzágúl Dosjanova.

Al jyl basynan oblysta 1146 adamdy ıt qapqan. Sondaı-aq adamdardy qańǵybas mysyqtar, jylqylar, qarsaq pen túlkilerdiń tistep alǵany týraly derekter tirkelgen. Olardyń barlyǵyna qutyrmaǵa qarsy vaktsına salyndy.

Eske sala keteıik, Baıanaýyldaǵy Shalqar kólinde 150 dala qusy belgisiz jaǵdaıda qyrylyp qalǵan.