Pavlodarda jyl basynan 97 zańsyz qoqys orny anyqtalǵan
PAVLODAR. KAZINFORM - «Qazaqstan Ǵarysh Sapary» derekterine sáıkes, jyl basynan beri oblys aýmaǵynda 97 zańsyz qoqys orny anyqtalǵan. Jergilikti atqarýshy organdar olardyń barlyǵy joıylǵany týraly esep bergen.
Bul týraly óńirlik ekologııa departamenti basshysynyń orynbasary Áset Syzdyqov málimdedi.
Onyń aıtýynsha, óńirdegi zańsyz qoqys oryndaryn anyqtaý jumystarynda ǵaryshtyq monıtorıng qoldanylady. Sonymen qatar reıdtik is-sharalar barysynda tabıǵatty qorǵaý talaptaryn buzǵan 13 jeke tulǵa ákimshilik jaýapkershilikke tartylǵan.
- Olarǵa jalpy somasy 4,8 mln teńgeden astam ákimshilik aıyppul salyndy. Qolda bar aqparatqa sáıkes, aıyppuldar tolyq kólemde óndirilgen, – deıdi Áset Syzdyqov.
Qazirgi ýaqytta Pavlodar oblysynda qatty turmystyq qaldyqtardy ornalastyrýǵa arnalǵan 321 nysan jumys isteıdi. Onyń ishinde Pavlodar, Ekibastuz jáne Aqsý qalalaryndaǵy úsh polıgon ǵana belgilengen ekologııalyq jáne sanıtarııalyq talaptarǵa sáıkes keledi. Qalǵan nysandardy talapqa sáıkestendirip, qajetti ruqsat qujattaryn alý qajet.
Ertis, Tereńkól, Maıqaıyń jáne Baıanaýyl eldi mekenderinde qatty turmystyq qaldyqtarǵa arnalǵan polıgondar salý boıynsha jobalyq-smetalyq qujattama ázirlengen. Budan bólek, tabıǵatty qorǵaý is-sharalarynyń josparyna sáıkes, Sharbaqty, Jelezın, Maı, Aqtoǵaı jáne Ýspen aýdandarynda da qatty turmystyq qaldyqtar polıgondaryn salý josparlanyp otyr.
Eske sala keteıik, bıyl Qazaqstanda 2637 zańsyz qoqys orny anyqtalyp, onyń 83%-y joıyldy.
