Pavlodarda jyl basynan 42,3 myń gektar jer aýyl sharýashylyǵyna qaıtarylǵan

PAVLODAR. KAZINFORM – Bıyl oblystaǵy jerlerdi aýyl sharýashylyǵy aınalymyna tartý jospary 180 myń gektardy quraıdy.

Óńirlik jer qatynastary basqarmasynyń basshysy Murat Hamıtovtyń aıtýynsha, qazirgi ýaqytta bıznes úshin jer alýdyń eki ádisi bar. Bos jer ýchaskesin saýda-sattyqqa (aýktsıonǵa) shyǵarý týraly usynystar berýge qatysa alady. Munda azamat ýchaskeni ózi tańdap, kórsetedi. Ekinshiden, saýda-sattyqqa (aýktsıondarǵa) qoıylatyn jer ýchaskeleri bar. Olardyń tizbesin jergilikti atqarýshy organdar qalyptastyrady. 

– Oblystaǵy jerlerdi aýyl sharýashylyǵy aınalymyna tartý boıynsha bıylǵy jospar – 180 myń gektar. Búgingi tańda ındıkatordyń oryndalýy 42,3 myń gektar nemese jyldyq jospardyń 23,5%-y. Qalalar men aýdandardyń ákimdikteri 220 mln teńgeden astam somaǵa jalpy aýdany 105 gektarǵa 36 aýktsıon ótkizdi, - dep atap ótti basqarma basyshy.

Byltyr jalpy aýdany 212 myń gektar bolatyn 609 aýyl sharýashylyǵy maqsatyndaǵy ýchaske berilgen. Onyń ishinde jer paıdalanýshylardyń erikti túrde bas tartýyna nemese jaldaý merziminiń aıaqtalýyna baılanysty buryn memlekettik menshikke qaıtarylǵan 77 myń gektar jer aınalymǵa tartyldy.

Eske sala keteıik, Pavlodar oblysynda 59 myńnan astam adam jer kezeginde tur.