Pavlodarda jetim balaǵa bólingen páterde aýdan ákiminiń orynbasary turyp kelgen

PAVLODAR. KAZINFORM — Pavlodar oblysy prokýratýrasy memlekettik turǵyn úıdi bólý qatysty birqatar zań buzýdy anyqtady. 

Ertis aýdanyndaǵy ekonomıkanyń naqty sektory bóliminiń basshysy aýdan ákiminiń orynbasaryna páter berý týraly sheshimdi óz betimen qabyldaǵan. Al baspana jetim balanyń atynda tirkelgen bolyp shyqty.

— Halyqtyń áleýmettik osal tobyna jatpaıtyn tulǵalarǵa zańsyz turǵyn úı berý faktileri anyqtaldy. Máselen Ertis aýyly, Mútkenov kóshesi, 32-úı, 10-páter mekenjaıy boıynsha halyqtyń áleýmettik osal toptaryn qamtamasyz etýge arnalǵan páterde aýdan ákiminiń orynbasary Roza Qabıbolqyzy Aqanova turady, — dedi prokýror oblystyq Ádep jónindegi keńeste.

Prokýratýra buǵan deıin de baspananyń tıesili adamdarǵa berilmegenin anyqtaǵan. Sondaı-aq bos turǵan 14 páter bar, biraq belgili sebeptermen sheneýnikter ony halyqtyń áleýmettik osal toptaryna berý boıynsha jumys istemeı jatyr.

Ádep jónindegi keńes músheleri zańǵa sáıkes áreket etý keregin, alaıda ákim orynbasarynyń páterde kóp turmaıtynyn eskerip, Ertis aýdandyq naqty ekonomıka sektory bóliminiń basshysy Qaırolla Eleýkenovke qyzmettik talaptardy tolyq oryndamaǵany týraly eskertý túrindegi tártiptik jaza qoldanýdy usyndy.

Eske sala keteıik, Pavlodarda áleýmettik mańyzy bar azyq-túlik baǵasyn ósirgen sheneýnikter jazalandy.