Pavlodarda jer úı órtenip, 40 jastaǵy er adam kóz jumdy

PAVLODAR. KAZINFORM - Pavlodar oblysynyń Shaldaı aýylynda jer úı órtendi. Oqıǵa ornyna barǵan órt sóndirýshiler ǵımarat ishinen 1984 jylǵy er adamnyń múrdesin tapty. 

Bul týraly QR Tótenshe jaǵdaılar mınıstrliginiń baspasóz qyzmeti habarlady. 

«Ótken táýlikte órt sóndirýshiler Almaty, Batys Qazaqstan, Qaraǵandy, Qyzylorda, Pavlodar oblystarynda jáne Almaty qalasynda turǵyn úı sektorlarynda 9 órtti joıdy. Tótenshe jaǵdaılar mınıstrliginiń kúshimen 3 sharýashylyq qurylystyń, 3 jeke turǵyn úıdiń jáne 3 monshanyń janýy sóndirildi. Pavlodar oblysy Sharbaqty aýdany Shaldaı aýylynda órtti sóndirý kezinde 1984 jyly týǵan úı ıesiniń denesi tabyldy», - dep málimdedi baspasóz qyzmetinen. 

Marqum azamat órtengen úıdiń ıesi bolǵany anyqtaldy. Ol órt saldarynan kóz jumǵan dep boljanyp otyr. Quqyq qorǵaý organdary órttiń shyǵý sebepterin anyqtap jatyr.

Eske sala keteıik, Pavlodar oblysynda órt oqıǵalarynyń 80%-y turǵyn úı sektorynda bolady.