Pavlodarda jer kezeginde 66 myńǵa jýyq adam tur
PAVLODAR. KAZINFORM – 2005 jyldan beri óńirde 8 myńnan astam adam turǵyn úı salý úshin jer alǵan. Jer telimderiniń baıaý berilip jatqanyna aýmaqtardyń sýmen jáne elektrmen jabdyqtaý jelilerimen ýaqytynda qamtamasyz etilmeýi sebepker.
Elimizdiń zańnamasyna sáıkes elimizdiń azamattary jeke úı salýy úshin memleket qorynan 10 sotyq jer ala alady. Alaıda bul talap Pavlodar oblysynda baıaý júrip jatqany baıaqalady.
Oblys ákimdiginiń aqparynsha, 2005 jyldan 2026 jylǵy sáýirge deıingi aralyqta turǵyn úı salý úshin 8 986 jer ýchaskesi berilgen.
– 2022 jyly engizilgen elektrondyq kezek bastalǵaly óńirde turǵyn úı salý úshin 966 jer ýchaskesi berildi. Byltyr 166 jer ýchaskesi úlestirilse, jyl basynan nebári 39 ýchaske berilgen, - dep habarlady ákimdikten.
Resmı statıstıkaǵa súıensek, sońǵy 22 jylda resimdelgen jer telimderiniń 2 961-i aýyldyq aımaqtarda berilgen. Ózgesi Pavlodar, Ekibastuz, Aqsý qalalaryna tıesili. Eń kóp sany 2024 jyly Ekibastuz (61) ben Aqsýda (69) tirkelgen.
Búgingi tańda oblys boıynsha turǵyn úı salý úshin jer ýchaskelerin alýǵa 65 914 ótinish tirkelgen. Basym bóligi Pavlodar qalasynda - 41 680 ótinish. Ekibastuz qalasynda - 11 710, Aqsý qalasynda 5 924 azamat on sotyqtan úmitker. Aýdandar arasynda Baıanaýyl (4 865) men Pavlodar (1 735) aýdandarynda ótinishter kóp.
– «Amanat» óńirlik jol kartasyn iske asyrýǵa sáıkes, oblysta 2026 jyly turǵyn úı salý úshin 250 jer ýchaskesin berý kózdelgen. Deıturǵanmen jer telimderin berýde biraz kedergiler bar. Qazaqstan Respýblıkasynyń qoldanystaǵy jer zańnamasynyń normalaryna sáıkes, jeke turǵyn úı qurylysy úshin jer ýchaskeleri tek sýmen jáne elektrmen jabdyqtaý jelilerimen qamtamasyz etilgen aýmaqtardan ǵana beriledi. Ortalyqtandyrylǵan aýyzsý júıesi joq eldi mekenderde elektrmen jabdyqtaý jelileri bolsa jetkilikti. Qajetti ınjenerlik jelilerdiń joqtyǵy jer ýchaskelerin úlestirýge múmkindik bermeı otyr, - dep qosty ákimdikten.
Eske sala keteıik, Aqtóbede 10 sotyq jer tek aýdandardan berilip jatyr.
