Pavlodarda JEO murjasynan býdaqtaǵan qara tútin jurtty shoshytty
PAVLODAR. KAZINFORM — Oblys ortalyǵynyń turǵyndary eki kún boıy soltústik ónerkásip aımaǵy jaqtan shyqqan qara tútindi baqylady. «Pavlodarenergo» kompanııasy onyń neden paıda bolǵanyn túsindirip berdi.
Oqıǵa ornynan túsirilgen kadrlar Instagram jelisinde paıda boldy. Onda qara tútinniń Pavlodar qalasynyń Soltústik ónerkásip aımaǵy jaǵynan býdaqtap shyǵyp jatqany baıqalady. Oblystyq tótenshe jaǵdaılar departamenti bul boıynsha shaqyrtý túspegenin habarlady.
Keıinirek tútin jergilikti JEO-2 stansasynan shyqqany málim boldy. Munda sońǵy eki kúnde mazýt janyp, murjadan qara tútin býdaqtaǵan.
— Pavlodar JEO-2-de rezervtik qazandyq agregaty jaǵyldy. Qazandyq agregattaryn jaǵý bekitilgen tehnologııalyq reglamentke sáıkes mazýtpen júzege asyrylady. Bul murjadan shyǵatyn tútinniń túsin ýaqytsha ózgertedi. Kelesi kúni energııa júıesiniń aımaqtyq dıspetcherlik ortalyǵynyń pármeni boıynsha stantsııada elektr energııasyn óndirýdi arttyrý úshin qosymsha rezervtik qazandyq agregaty jaǵyldy. Qazandyq agregatyn jaǵý uqsas tehnologııa boıynsha júrgizildi, — dep habarlady «Pavlodarenergo» AQ.
Kompanııa kásiporynnyń normatıvtik qujattarynda qazandyq agregattaryn mazýtpen jaǵý jáne qosymsha qyzdyrý kezindegi lastaýshy zattardyń shyǵaryndylary eskerilgenin jetkizdi. Túziletin lastaýshy zattardyń kólemi kásiporynnyń jalpy ekologııalyq eseptiligine kiredi.
Jaǵdaıǵa qatysty Pavlodar oblysy boıynsha ekologııa departamenti de pikir bildirip, áleýmettik jelilerdegi jazbalardan keıin bul máselege nazar aýdarǵandaryn atap ótti.
— Atalǵan derek boıynsha ekologııa departamenti JEO-2-ge sanıtarlyq-qorǵaý aımaǵynda zerthanalyq zertteýler júrgizý úshin bardy. Nátıjeleri taıaý kúnderi belgili bolady, — dep jaýap berdi Pavlodar oblysy boıynsha ekologııa departamenti basshysynyń orynbasary Áset Syzdyqov.
Ekologter JEO-2 mańynda shań, azot oksıdi jáne kómirtek oksıdine ólsheý júrgizdi. Zertteý nátıjelerin keıinirek jarııalaýǵa sóz berdi.
Eske sala keteıik, Pavlodardaǵy synaq kezinde jelilerde 57 aqaý anyqtalyp, qalanyń bir bóligi ystyq sýsyz qaldy.
