Pavlodarda jeńil kólik jylqyǵa soǵylyp, eki adam qaza boldy

PAVLODAR. KAZINFORM — «Pavlodar-Qyzylorda» avtojolynda Toıota markaly kólik jol ústinde turǵan jylqyǵa soǵylǵan. Apat saldarynan eki jolaýshy kóz jumdy.

Polıtsııa taratqan málimet boıynsha, 2 qazan kúni Atameken aýylynan 17 km jerde, «Pavlodar-Qyzylorda» avtojolynda «Toyota Alphard» avtokóligi jylqyǵa soǵylǵan. Jol apaty saldarynan kólik joldan shyǵyp ketip aýdarylǵan.

— Jol-kólik apaty saldarynan eki jolaýshy qaza taýyp, júrgizýshi jaraqat aldy. Polıtsııa atalǵan qaıǵyly oqıǵa boıynsha qylmystyq is qozǵady. Tergeý aıasynda jylqy ıesiniń is-áreketine quqyqtyq baǵa beriledi, — dep habarlady óńirlik polıtsııa departamentinen.

Tártip saqshylary mundaı oqıǵalardyń aldyn alý úshin jol qozǵalysyna qatysýshylarǵa jyldamdyq rejımin saqtaý, kólik quralynyń tehnıkalyq jaǵdaıyn únemi baqylaý mańyzdy ekenin eske salady.

Eske sala keteıik, Pavlodar-Astana avtobanynda jol-kólik apatynan bes adam kóz jumǵan edi.