Pavlodarda jeńildetilgen jolaqydan bas tartý usynyldy
ASTANA. QazAqparat - Pavlodarda qys mezgilinde joldarǵa tuz sebýden jáne oqýshylarǵa arnalǵan jeńildetilgen jolaqysynan bas tartý usynyldy. Mundaı pikirdi turǵyn úı kommýnaldyq sharýashylyǵy máseleleri jónindegi qalalyq máslıhat depýtattarynyń turaqty otyrysynda «Pavlodar avtokombınaty» JShS-niń dırektory Aleksandr Panchenko bildirdi, dep habarlaıdy pavlodarnews.kz.
«Birinshiden, qarǵa sebilgen tuz kóliktiń tómengi shaǵyn shiritip, bizdi shyǵynǵa batyrady. Bir avtobýsty jóndeý úshin 450 myń teńge aqsha men úsh apta ýaqyt ketedi. Tuz sebýdi toqtatý kerek. Ekinshiden, jeńildigi bar jolaqynyń kúshin joıý kerek dep esepteımin. Sebebi, biz jalǵan qujat jasatyp alyp, qoǵamdyq kólikterde jeńildikpen júretin eki synypty anyqtadyq. Mektep dırektoryna ýáde bergendikten, qaı bilim ordasy ekenin aıtpaımyn. Sonymen qatar, jýyrda Temirjol kolledjiniń bir stýdenti jalǵan anyqtamasymen ustalyp qaldy. Mundaı buzýshylyqtar bizdi shyǵynǵa batyrap jatyr. Qazirden alaıaqtyqqa barsa, eseıe kele ol balalar elge zııanyn keltiredi»,- deıdi Aleksandr Panchenko.
Óz kezeginde qalalyq máslıhattyń hatshysy Záýresh Muqasheva bul máseleni bilim basqarmasy arqyly sheshý kerektigin atap ótti. «Bular - bizdiń balalar, olardy tárbıeleýimiz kerek. Qandaı mektep ekenin aıtyp, dırektormen jáne bilim basqarmasymen keńese otyryp sheshimin tabýǵa bolatyn sııaqty. Birneshe adamǵa bola, búkil balany jeńildikten aıyrýdyń keregi joq», - dedi Záýresh Muqasheva.
Qalalyq TÚKSh mamandarynyń aıtýynsha, qysqy mezgilde joldarǵa tuz emes, tuz qosylǵan arnaıy qospa sebiledi. Tuzsyz reagentterdi alý kóp qarjyny talap etedi. Atalmysh másele áli de ashyq kúıde qalyp otyr.
