Pavlodarda jeke sharýanyń úıýli turǵan 40 tonna shóbi órtenip ketti

PAVLODAR. KAZINFORM - Pavlodarda jeke sharýashylyq ıeliginde turǵan 40 tonna shóp órtenip ketti. Shyǵyn kólemi eseptelip jatyr.

Pavlodar oblysy Maıqaıyń kentinde qysqy mal azyǵy órtendi. Jeke sharýashylyqtyń aýlasynda úıip qoıylǵan 130 orama shóp janyp ketken.

Bul týraly óńirlik tótenshe jaǵdaılar departamentiniń baspasóz qyzmeti habarlady.

«15 qyrkúıek kúni Maıqaıyń kentinde shóp janyp jatqany týraly habarlama tústi. Belgili bolǵandaı, jeke menshik aýladaǵy qurylystyń 250 sharshy metrinde 40 tonna shóp órtendi. Bul shamamen 130 orama. Órtti sóndirýge órt sóndirý beketiniń, JZQ, MÓQQ qyzmetkerleri, barlyǵy 17 adam jáne «Maıkaıyńaltyn» AQ-nyń júk tıegishi jumyldyryldy», dep málimdedi departamentten.

Aldyn ala boljam boıynsha jalynnyń tutanýyna órtke qarsy qaýipsizdik sharalarynyń júrgizilmeýi sebep bolǵan.

Tótenshe jaǵdaı qyzmetkerleri shópti elektr jelilerinen 15 metr, joldardan 20 metr jáne turǵyn úı qurylystarynan 50 metr qashyqtyqta saqtaý kerek ekenin aıtady. Shóp, jemazyq nemese dándi daqyldar saqtalatyn jerlerdi alǵashqy órt sóndirý quraldarymen qamtamasyz etý qajet. Ashyq dalada shóp jınaý kezinde mıneraldanǵan jolaqtardy jasaý qajet. Sondaı-aq, traktorlardy ushqyn sóndirgishtermen jabdyqtaý qajet. Mundaı qurylǵylardyń bolýy órttiń aldyn alýǵa jáne múlikti saqtaýǵa kómektesedi.

Eske sala keteıik, Pavlodarda «Kvazar» saýda úıinen órt shyǵyp, 150 adam evakýatsııalandy.