Pavlodarda jeke menshik sektordy qardan tazalaýǵa 32 mln teńge bólindi
PAVLODAR. QazAqparat - Pavlodar qalasynda jeke menshik sektorlarda úıilip qalǵan qardy syrtqa shyǵarý úshin 32 mıllıon teńge bólinip otyr, dep habarlaıdypavlodarnews.kz.
«Qala boıynsha sý basýy múmkin birneshe aımaqtar bar. Qajet kezde ol jerlerge arnaıy tehnıka men mamandardy jiberýge daıynbyz. Sonymen qatar Lenın kenti men Kenjekól aýylynda ornalasqan dambalardy jeke menshikke alyp, baqylaý júrgizemiz. Atalmysh sý bógetteri TÚKSh bóliminiń qaraýyna beriledi», - deıdi shahar basshysy Nurjan Áshimbetov.
Aıta keteıik, búgingi tańda Pavlodarda tasqynnyń aldyn alý boıynsha 1000 tehnıka, 100 tekshe metr qıyrshyq tas pen 200 tekshe metr qum daıyn tur. Bıylǵy jyly jaýǵan qar deńgeıi ádettegi kórsetkishten 30 paıyz joǵarylap, 24-26 santımetrge jetken. Osy ýaqytqa deıin qala ishinen 1,2 mıllıon tonna qar syrtqa shyǵaryldy.
Oblystyq TJD basqarmasynyń bastyǵy Álibek Dlımovtyń aıtýynsha, aýdandar men qalalarda 54 myń qap topyraq pen segiz myń tonnaǵa jýyq ınertti materıaldar bar. Pavlodar, Jelezın, Lebıaji, Maı jáne Sharbaqty aýdandary qajet kezde turǵyndardy azyq-túlikpen qamtamasyz etetin bolady. «Evakýatsııalaý jumystaryn júrgizýge 154 pýnkt saqadaı saı. Bul - mádenıet úıleri, aýrýhanalar men bilim oshaqtary», - deıdi ol.
