Pavlodarda jedel járdem stansasyna alty reanımobıl kóligi berildi
ASTANA. QazAqparat - Búgin Pavlodarda oblystyq jedel járdem stansasyna óńir basshysy Bolat Baqaýov alty reanımobıl kóliginiń kiltin tapsyrdy. Saltanatty rásim kardıologııalyq ortalyq alańynda ótti, dep habarlaıdy pavlodarnews.kz.
«Óńirde jedel járdem qyzmetin jańǵyrtýǵa arnalǵan ilki joba aıasynda aýqymdy jumystar atqarylýda», - dep atap ótti Bola Baqaýov. - Mundaı qýanyshty jańalyq respýblıka boıynsha bizde birinshi bolyp oryn aldy. Jańa kólikter tótenshe jaǵdaılar oryn alǵan kezde qala ishine nebári on mınýtta, al oblys boıynsha 30 mınýttyń ishinde jetip, shuǵyl medıtsınalyq kómek kórsete alady. Sondaı-aq ol reanımobıl kólikteriniń zamanaýı qurylǵylarmen jabdyqtalǵandyǵyn atap ótti. «Kelesi jyly oblystyq bıýdjettiń esebinen 80 avtomobıl alynady. Onyń ishinde 10-reanımobıl, 20 jedel járdem kóligi jáne aýyl turǵyndaryna arnalǵan 50 mashına bar. Osylaısha, aýyldardaǵy jedel járdem kólikterine degen qajettilikti 100 paıyz jabamyz», - dedi aımaq basshysy.
B. Baqaýov búgin ashylǵan psıhonevrologııalyq ortalyq týraly da aıtty, taıaýda Maı aýdanynda omyrtqa dertimen syrqattanǵan jandarǵa arnalǵan ońaltý ortalyǵy paıdalanýǵa beriletinin jetkizdi. Munymen qatar aldaǵy jyly Konstantınovka eldi mekeninde esirtkige táýeldilerge arnalǵan ortalyq ashylmaq. Al oblystyq onkologııalyq ortalyq qurylysyna qajetti qarajat ta bólingen.
