Pavlodarda jazǵyturym qaýip kózinde qalatyn eldi mekenderde daıyndyq qalaı
PAVLODAR. KAZINFORM — Aýa raıyn boljaýshylar Ertis-Baıan óńirinde keler jyldyń aqpan jáne naýryz aılary ádettegiden 2 gradýsqa jyly bolady dep boljap otyr. Bul jazǵyturym qardyń kúrt erýine ákelip, sý tasqyny mezgilin kúrdelendire túsýi yqtımal.
Pavlodar oblysynda aldaǵy jyldyń sý tasqyny mezgiline daıyndyq jumystary júrgizilip jatyr. Eldi mekenderdi sý basý qaýpin barynsha azaıtý maqsatynda oblys ákiminiń qaýlysymen «Injenerlik jumystar jospary» bekitilgen.
— Jospar aıasynda 30 shaqyrymǵa jýyq qorǵanys jáne jol ınfraqurylym nysandary qalpyna keltirilip, nyǵaıtyldy. 29 sý ótkizý qubyry ornatylyp, jóndeýden ótkizildi. Sondaı-aq eldi mekenderdegi aryqtar men sý burý arnalary tazartylyp, retke keltirildi, — dep habarlady óńirlik tótenshe jaǵdaılar departamenti bastyǵynyń orynbasary Qaırat Shaımardenov.
Mamandardyń aıtýynsha, Baıanaýyl jáne Aqtoǵaı aýdandaryndaǵy eldi mekender erekshe baqylaýda tur.
Baıanaýyl aýdanynda sý tasqyny qaýpin tómendetý maqsatynda Jańajol jáne Q.Sátbaev aýyldarynda sýarmaly júıelerdi qaıta jańartý jumystary júrgizilip jatyr. Atalǵan jobalar arqyly 3,6 myń gektar aýmaqta 23 mln tekshe metrden astam sýdy qabyldap, retteý múmkindigi paıda bolady.
Aqtoǵaı aýdany Sholaqsor aýyly mańynda Sileti ózeniniń arnasyn túzeý jáne tereńdetý jumystary atqaryldy. Jalaýly aýylynda 200 mln tekshe metr kóleminde erigen qar sýlaryn jınaýǵa arnalǵan 3 toǵan qazylyp, jer úıindileri jasalǵan.
Al Ertis ózeniniń oıpań tustarynda jergilikti atqarýshy organdardyń kúshimen jalpy uzyndyǵy 63,8 shaqyrymdy quraıtyn topyraq úıindileri turǵyzylǵan.
Qazirgi ýaqytta Tótenshe jaǵdaılar departamentiniń qyzmetkerleri jergilikti atqarýshy organdarmen birlesip, oblystyń aldaǵy sý tasqyny kezeńine daıyndyǵyn baǵalaý maqsatynda eldi mekenderdi aralap, tekserý jumystaryn júrgizip jatyr.
— Jazǵyturym kezeńde yqtımal tótenshe jaǵdaılardyń aldyn alý jáne joıý maqsatynda departamentpen KamAZ bazasyndaǵy 2 sý sorý avtokóligi, 5 Skoda Kodiak jedel-qyzmettik avtokóligi, 1 Toyota Hilux bazasyndaǵy jedel áreket etý avtokóligi, 6 aspaly qaıyq motory, 2 úrlemeli qaıyq, 1 ushqyshsyz ushý apparaty (dron), 1 tentti júk kóligi, 13 tasymaldanatyn motopompa, 1 tirkemeli motopompa satyp alyndy. Barlyq qutqarý bólimsheleri sý ótkizbeıtin arnaıy qorǵanys kostıýmderimen qamtamasyz etildi, — dep qosty departament ókili.
Al «Qazgıdromet» RMK Pavlodar oblystyq fılıalynyń habarlaýynsha, qazir aımaq boıynsha ortasha jaýyn-shashyn mólsheri ótken jyldyń sáıkes kezeńimen salystyrǵanda 76%-ǵa kóp (2024 jyly — 13 mm, 2025 jyly — 23 mm). Topyraqtyń qazirgi qatý tereńdigi orta eseppen ótken jylmen salystyrǵanda 33%-ǵa joǵary (2024 jyly — 6 sm, 2025 jyly — 8 sm).
— Qarasha aıy ádettegiden jyly bolyp tur. Oblys boıynsha ortasha aýa temperatýrasy normadan 1 gradýsqa joǵary (-5, -6°S), jaýyn-shashyn mólsheri — normaǵa jýyq (16–23 mm). Jeltoqsanda aýa temperatýrasy normadan aýytqymaı, ortasha táýliktik temperatýra -10, -14 gradýs bolyp saqtalady. Qańtardaǵy temperatýra da norma sheginde bolady. Tek aqpan men naýryz aılarynda aýa temperatýrasy normadan 1–2°S joǵary bolady dep boljanady, — dep málimdedi «Qazgıdromettiń» jergilikti fılıalynan.
Eske sala keteıik, Aqtóbede sý tasqyny qaýpi bar aımaqtarda qaýipsizdik sharalary kúsheıtilgeni belgili boldy.