Pavlodarda jastarǵa arnalǵan alǵashqy IT-ortalyq ashyldy
PAVLODAR. QazAqparat - Búgin Pavlodarda jastar bastamalaryn damytý ortalyǵynda alǵashqy IT-ortalyq ashyldy, dep habarlaıdy QazAqparat pavlodarnews.kz-ke silteme jasap.
Ortalyqtyń ashylý sharasyna Pavlodar oblysyna jumys saparymen kelgen Qazaqstan Respýblıkasynyń Din isteri men azamattyq qoǵamynyń vıtse-mınıstri Abzal Núkenov pen oblys ákiminiń orynbasary Meıram Begentaev qatysty.
IT-ortalyqtyń basshysy Darhan Shúrenovtyń aıtýynsha, ortalyq jasy 14-ten 29-ǵa deıingi jastardy oqytýǵa arnalǵan. Olar qyzyqty robototehnıka negizderin zertteý, baǵdarlamalyq qamtamasyz etý, mobıldik qosymshalar men saıttardy jáne baǵdarlamalardy tegin qura alady. Bolashaqta ǵımarattyń «S» korpýsynda robototehnıka kabıneti ashylady.
«Dál osyndaı IT-ortalyqty men alǵash ret kórip turmyn, - deıdi Abzal Núkenov. - Pavlodarlyq jastar jańa ınnovatsııalyq tehnologııalardy meńgerip qoımaı, olardy jasap shyǵarýda. Áleýmettik ekonomıkalyq mańyzy bar mundaı ortalyqtardyń kóp bolǵany jaqsy. Óńirdegi bıznes ókilderin jastarǵa qoldaý berýge shaqyramyn».
Kezdesý barysynda pavlodarlyq stýdentter men oqýshylar ózderiniń start-ap jobalaryn meımandarǵa tanystyrdy.
