Pavlodarda jastarǵa arnalǵan 10 mln teńge «Ertis daryny» syıaqysy taǵaıyndaldy
NUR-SULTAN. QazAqparat – Pavlodardyń Jastar bastamalaryn damytý ortalyǵynda qoǵamnyń belsendi býynymen keńes otyrysy ótti, dep habarlaıdy pavlodarnews.kz.
Jıynǵa oblys ákimi Bolat Baqaýov, respýblıkalyq jastar uıymdarynyń kóshbasshylary men óńir jastary qatysty.
- Respýblıkada jyl saıynǵy jastarǵa arnalǵan «Daryn» úkimettik syılyǵy bekitilgen, - dep atap ótti Bolat Baqaýov. - Jastar jyly bizdiń oblysta osyndaı syılyqty qarastyrýdy jáne oǵan «Ertis daryny» ataýyn berip, laýreattar úshin keminde 10 mln teńge júlde qoryn taǵaıyndaý týraly tujyrymdama ázirleýdi usynamyn.
Atalmysh syıaqyny 1 jeltoqsan - QR Tuńǵysh Prezıdenti kúni tapsyrý týraly sheshim qabyldandy.
Sonymen qatar, Pavlodarda «Bolashaq» qaýymdastyǵynyń fılıalyn ashý usynyldy. Búginde prokýratýra organdarynda jumys isteıtin halyqaralyq stıpendııa ıegeri Erjan Dosymjanov óńirde osy baǵdarlama boıynsha oqyǵan 200-den astam adam bar ekenin atap ótti.
- «Bolashaq» baǵdarlamasy boıynsha bilim alǵandar úshin alań qurylsa, halyqaralyq stıpendııaǵa úmitkerler sol jerde oqýǵa túsý men oqýdyń qyr-syry týraly biletin edi, - dedi Erjan Dosymjanov. - Ókinishke oraı, oblysta mundaı alań joq. Statıstıka boıynsha, aımaqta 203 túlek bolsa, meniń WhatsApp tobymda tek 20-sy ǵana bar. Biz NIS mektebiniń platformasynda únemi kezdesip turamyz. Bul bilim ordasynyń dırektory Rınat Jumabaev bolashaqtyq bolyp tabylady. Barlyq 203 adamdy jınaý múmkin emes, sondyqtan platforma qajet.
Oblys ákimi Bolat Baqaýov jastar bastamalaryn damytý ortalyǵy bazasynda qaýymdastyqtyń fılıalyn qurýdy jáne onda tek «Bolashaq» stıpendıattaryn ǵana emes, sonymen qatar shetelde bilim alǵandardyń barlyǵyn biriktirýdi usyndy.
«Bolashaq» respýblıkalyq qaýymdastyǵynyń atqarýshy dırektory Laýra Demesınovanyń aıtýynsha, elimizde 8 Korporatıvtik qor jumys isteıdi. Ol pavlodarlyqtarǵa qoldaý kórsetýge ýáde berip, aımaqtarǵa baǵyttalǵan Network, Jastar kadrlyq rezervi, «Jastar Otanǵa» jastar festıvaline qatysýǵa shaqyrdy.
Otyrystyń sońynda óńir basshysy jastar ortalyǵyna vokaldyq-aspaptyq ansamblge mýzykalyq aspaptar satyp alý úshin sertıfıkat tabys etti.
