Pavlodarda «Jastar» shaǵyn aýdanyn jobalaýǵa engizilgen túzetý qaıta qaralady
PAVLODAR. KAZINFORM - Pavlodarda «Jastar» shaǵyn aýdanyn jobalaýǵa engizilgen túzetýler qaıta qaralatyn boldy. Buǵan prokýratýra organdarynyń atalǵan aýmaqta turǵyn úıler qurylysyn júrgizýge ruqsat bermeýi sebep bolǵan. Túzetý endi Pavlodar qalasynyń bas josparyn qaraý kezinde qaıta qaralýy múmkin.
Oblystyq prokýratýra «Jastar» shaǵyn aýdanynyń egjeı-tegjeıli josparlaý jobasy sáýlet jáne jer zańnamasynyń normalaryna qaıshy ekenin anyqtady.
«Jergilikti atqarýshy organ ónerkásiptik zaýyttardan maksımaldy qashyqtyqty esepke almaı, kóppáterli úıler men áleýmettik nysandar salýdy josparlaǵan. ıAǵnı, óndiristik, kommýnaldyq jáne qoıma obektileri jaqyn mańdaǵy turǵyn úı-azamattyq qurylystardyń sanıtarlyq-qorǵaý aımaǵyn buzatyn edi. Jalpy qurylys alańy 186 gektar boldy. Qadaǵalaý aktisi boıynsha zańsyz josparlaý jobasy joıyldy», - dep málim etti oblystyq prokýratýradan.
Pavlodar qalalyq sáýlet jáne qala qurylysy bólimi basshysynyń orynbasary Jangeldi Shalǵymbaevtyń aıtýynsha, bolashaq shaǵyn aýdandy egjeı-tegjeıli jobalaý 2020 jyly qabyldanǵan. Al 2022 jyldyń naýryzynda demeýshiler esebinen túzetý engizilgen. Ol boıynsha aýmaqta turǵyn úıler men áleýmettik nysandar turǵyzylýy kerek edi.
«Jobany ázirleýshi «GeoData Plıýs» JShS aýmaqty tyńǵylyqty zerttep, aýdan eshbir sanıtarlyq jáne ekologııalyq normalardy buzbaıtynyn kórsetken. Sanıtarııalyq-qorǵanysh aýmaqtary esepteı kelgende myń metrden asty. Buǵan qosa ol jerde 10 myń túp aǵash otyrǵyzyldy. Bas josparǵa sáıkes, bolashaq aýdannyń basym bóligi turǵyn úıler men qoǵamdyq qurylystardy salýǵa arnalǵan rezervtik aýmaqqa engizilgen. Biraq aýdannyń biraz bóliginiń ónerkásiptik aýmaqqa da qatysy bar», - dep túsindirdi J.Shalǵymbaev.
Qala bıligi prokýratýranyń málimdemesimen daýlaspaıtynyn jetkizdi. Soǵan sáıkes jobalaýǵa engizilgen túzetýlerdi joıý týraly qaýly qabyldandy. Ol keıinirek qaıta qaralmaq.
