Pavlodarda jastar qarbyz jeýden jarysty

PAVLODAR. QazAqparat - Jastar bastamalaryn damytý ortalyǵynyń avtoturaǵy aımaǵynda «Qarbyz FEST» oblystyq festıvali ótti, dep habarlaıdy pavlodarnews.kz.

Sharaǵa oqý oryndarynyń eriktiler jasaqtary, aýyl jastary, óńir qonaqtary, barlyǵy 400-den astam adam qatysty. Aqqýly aýdany Sharbaqty aýdany «Súırik» sharýa qojalyǵynyń basshysy Arsen Abdrahmanov festıvalge oraı demeýshi retinde elýden astam qarbyz alyp kelgen.

«Bizdiń qarbyzdarymyzdyń quramynda selıtra joq. Taza tabıǵı ónim. Bala kezimde ákem qaýyn egýmen aınalysatyn. Bul otbasylyq bıznes. Jyl saıyn aýa raıyna baılanysty on bes shaqty túrin egemiz. «Ledı», «Farao», «Holodok» degen suryptar tanymal. Seksen kúnniń ishinde pisedi. Jylyna 250-300 tonna ónim jınaımyz. Tuqymdaryn Reseı men Qytaıdan, Reseıden ákelemiz»,- deıdi Arsen Abdrahmanov.

Eriktiler ortalyǵynyń jetekshisi Saıagúl Serikbekqyzynyń aıtýynsha, osy shara barysynda birneshe alań jumys isteıdi. «Bon appetite» kezeńinde uldar men qyzdar ýaqytqa qarbyz jeýden jaryssa, «HeavyQARBYZ» bóliminde qarbyzdy kóterýden synǵa tústi. Sonymen qatar, №1 kórkemsýret mektebiniń oqýshylary natıýrmorttan, servıs jáne tamaqtaný kolledjiniń stýdentteri «ARTbýz» alańynda qarbyzdy ádemilep bezendirýden sheberlik synybyn uıymdastyrdy. Budan basqa, Ertis óńiriniń talantty jastary mýzykalyq nómirler usyndy.

«Byltyrǵy jyly Batyr mall oıyn-saýyq ortalyǵynyń aýmaǵynda ótkizgen bolatynbyz. Bıyl Jastar jyly aıasynda eriktiler jasaqtary arasynda ótti. Bul joly qatysýshylardyń sany artqany baıqalady. Aýyldyq aımaqtar men qalalardan kelip otyr»,- deıdi Saıagúl Serikbekqyzy.

Mundaǵy basty maqsat - jergilikti baqsha ónimderin óndirýshilerdi nasıhattaý jáne kópshilikke taratý.