Pavlodarda jasy 80-nen asqan zeınetker kishkentaı qyz balalarǵa azǵyndyq jasaǵan
PAVLODAR. KAZINFORM – Qart adam qazirgi ýaqytta jasaǵan áreketi úshin qamaýǵa alyndy. Oǵan qatysty qylmystyq is qozǵaldy.
Zeınetker qyz balalardy kóshede oınap júrgen jerde kezdestirip, aldap úıine shaqyrǵan.
«Jasóspirimderdiń jasy 11-ge de tolmaǵan. Pavlodar qalasynda turatyn, jasy 80-nen asqan zeınetker olardy kóshede kezdestirip, úıine shaqyrǵan. Sóıtip olarǵa azǵyndyq áreket jasaǵan. Atalǵan fakti joǵalǵan balalardy izdeý barysynda belgili boldy. Búldirshinder tabylyp, qylmysker ustaldy», - dep habarlady Pavlodar oblystyq polıtsııa departamenti ıývenaldy polıtsııa tobynyń erekshe tapsyrmalar jónindegi aǵa ınspektory Bıbigúl Qamzına.
Qazirgi ýaqytta azamatqa qatysty sotqa deıin qylmystyq is júrgizilip jatyr.
Jyl basynan beri Pavlodar oblysynyń aýmaǵynda jalpy sany 16 balanyń jynystyq qol suǵylmaýshylyq quqyqtary buzylǵan. Ótken naýryz aıynda oblys ortalyǵyndaǵy balalar aýrýhanasyna denesinde jaraqaty bar jasóspirim túsken. Keıin belgili bolǵandaı, jaqyn týysy oǵan azǵyndyq áreketter jasaǵan.
Al, Aqsý qalasynda 15 jasar qyz 17 jastaǵy bozbaladan júkti bolyp qalǵan. Eki taraptyń ata-anasy keıin ózara kelisimge kelgen.
