Pavlodarda jas polıtseıler ant qabyldady
PAVLODAR. KAZINFORM - Quqyq qorǵaý salasyna jańadan qabyldanǵan qyzmetkerler azamattardyń quqyǵy men bostandyǵyn qurmettep, qorǵaýǵa, qyzmettiń qıyndyǵyna tabandylyqpen tózýge ant berdi.
Іshki ister organdarynda qaza tapqan qyzmetkerlerdi eske alý memorıalynda ótken saltanatty sharaǵa sala ókilderi men ardagerleri de qatysty. Jas polıtsııa qyzmetkerleri halyq pen memleketke adal qyzmet etýge ant qabyldady.
Pavlodar qalalyq Polıtsııa basqarmasynyń bastyǵy Málik Ońǵarbaev bul halyqqa qyzmet etýge arnalǵan adaldyq anty ekenin jáne jas qyzmetkerler oǵan árdaıym berik bolýy kerek ekenin atap ótti.
«Sizderge azamattardyń qaýipsizdigin qamtamasyz etý jáne qylmysqa qarsy janqııarlyqpen kúresý jaýapkershiligi júkteledi. Árqaısyńyz júrektiń qalaýymen polıtsııa qataryna qosylyp otyrsyzdar. Sondyqtan antqa adal bolyńyzdar», – dedi óńirlik Іshki ister organdary jáne Ulttyq ulan ardagerleri keńesiniń tóraǵasy Baqberdi Abraev.
«Ant qabyldaý ómirimdegi eń mańyzdy sát bolyp tur. Pogon taǵý meniń balalyq shaǵymnan bergi armanym edi. Endi naǵyz polıtseı boldyq. Men Otan aldynda adal qyzmet etemin, qylmysqa qarsy kúreste árdaıym jumylyp jumys isteımin. Eldiń tynyshtyǵyn saqtaýǵa óz úlesimdi qosamyn», - deıdi polıtsııa kishi serjanty Ýaq Ásem.
Ofıtserler men serjanttar qyzmettik mindetterin atqarý kezinde qaza tapqan ishki ister organdarynyń qyzmetkerlerin bir mınýt únsizdikpen eske aldy.