Pavlodarda jas anaǵa muz kesegin laqtyryp, basyn jarǵan turǵyn izdestirilip jatyr

Oblys ortalyǵynda Nazarbaev dańǵyly, № 157 úıdiń janymen ótip bara jatqan jas ananyń basyna áldebireý joǵarydaǵy terezeden muz kesegin laqtyrǵan. Aýyr zattyń saldarynan áıel adamnyń basy jarylǵan. Beınejazba jergilikti áleýmettik jelide paıda boldy. 

Bir qyzyǵy, bul oqıǵa 8 shilde kúni bolǵanymen, atalǵan jaıt úshin eshkim jaýapkershilikke tartylmaǵan. Zardap shegýshiniń týystary áleýmettik jelide áıeldiń basyn jarǵan adamdy ózderi izdeýge májbúr ekenderin jazǵan. Polıtsııa organdary áleýmettik jelidegi jazbalardan soń ǵana máselege kóńil aýdarǵan.

— Polıtsııa qyzmetkerleri beınebaqylaý kameralaryndaǵy jazbalardy alyp, zerdeledi. Kýágerlerden jaýap alyp, basqa da qajetti tergeý áreketterin júrgizdi. Beınejazbada jábirlenýshiniń ústine zattyń qulaǵan sáti tirkelgen. Densaýlyqqa qasaqana jeńil zııan keltirý deregi boıynsha qylmystyq is qozǵaldy. Qylmystyq is Pavlodar oblysy polıtsııa departamenti basshylyǵynyń erekshe baqylaýynda, — dep habarlady óńirlik polıtsııa departamentinen.

Qazirgi ýaqytta oqıǵanyń barlyq mán-jaıy anyqtalyp jatyr. Atalǵan jaıtqa qatysy bar tulǵany anyqtaý, ony zańda belgilengen jaýapkershilikke tartý boıynsha barlyq qajetti sharalar qabyldanyp jatyr.

Eske sala keteıik, Astanada gaz ballony jarylyp, úsh adam zardap shekti.