Pavlodarda jas ana memlekettik baǵdarlama arqyly balalar kıimderin shyǵarýda
ASTANA. QazAqparat - Pavlodarda «Bıznestiń jol kartasy - 2020» baǵdarlamasy aıasynda 2 mln. 600 myń teńge grant alǵan 24 jastaǵy Valerııa Narkızova «Jasmın» toqyma stýdııasyn ashyp, óz kásibin damytýda, dep habarlaıdy pavlodarnews.kz.
Jas kásipkerdiń aıtýynsha, sábılerge arnalǵan kıim daıyndaýǵa usynys kóp túsedi. Analar kóp jaǵdaıda jekelegen, ataýly buıymdarǵa tapsyrys berip, sábıi úshin jasalatyn buıymnyń dızaınyn jasaýǵa ózderi atsalysady.
Alǵashqy tapsyrys perzenthanadan shyqqan kúni bir palatada jatqan kelinshekten túsken. Búginde bes jáne jáne bir jasar eki balany tárbıelep otyrǵan ana úsh adamdy jumyspen qamtyǵan.
«Men ózimniń súıikti isimdi qolǵa aldym. Bala kúnimnen tigin tigýmen aınalysamyn, alaıda osy ispen tabys tabamyn dep oılamappyn. Ekinshi balamdy kótergenimde úıge qandaı kıimmen shyǵamyz degen oı týdy. Barlyq dúkendi aralap, kóńilimnen shyǵatyn zatty tappadym. Bos ýaqytym da jeterlik edi. Sondyqtan mata satyp alyp, eshkimde qaıtalanbaıtyn týyndy jasaýǵa bel býdym», - deıdi Valerııa Narkızova.
Óńirlik kásipkerler palatasyna júgingen jas ana bıznesti qoldaý sharalary jaıly aqparat alyp, memlekettik baǵdarlamaǵa qatysýdy jón kórgen.
«Sheberler quralǵan tobymyz sábılerge arnalǵan keremet dúnıeler jasap jatyr. Sapa eń birinshi orynda. Sondyqtan gıpoallergendi mata men qazirgi zamandaǵy ozyq tehnologııany qoldanamyz. Árbir klıenttiń talǵamyna qaraı tapsyrysty jekeleı qaraımyz. Ár buıymnyń dızaıny muqııat daıyndalady», - deıdi kásipker.
Aıta keterligi, Pavlov kóshesi, 11/1 mekenjaıy boıynsha «Saryarqa» saýda úıinde ornalasqan «Jasmın» balalar toqymasynyń stýdııasy barlyq tekserýden ótip, sapa sáıkestigi sertıfıkatyn alǵan. Sonymen qatar, onlaın rejıminde áleýmettik jeliler arqyly tapsyrys alý arqyly saýda jasaıdy.
