Pavlodarda jarys kezinde sportshy qyzdy uryp jibergen voleıbol bapkerine qylmystyq is qozǵaldy
PAVLODAR. KAZINFORM — Pavlodarda voleıboldan Qazaqstan chempıonatynyń II týry kezinde jattyqtyrýshynyń jasóspirim qyzǵa qol kótergen sáti vıdeoǵa túsip qaldy. Oqıǵadan keıin Qazaqstan ulttyq voleıbol federatsııasy jattyqtyrýshyny jarystardan shettetý týraly sheshim qabyldady.
Oqıǵa 2009 jyly týǵan jáne odan kishi jastaǵy qyzdar arasynda ótip jatqan voleıbol jarysy kezinde bolǵan. Áleýmettik jelilerde taraǵan beınejazbada Shymkent qalasynyń «Voleıbol Kıds» jeke klýbynyń jattyqtyrýshysy Hamıt Myrzabekovtiń komanda oıynshysyna qol kótergeni baıqalady.
Shymkent qalasynyń dene shynyqtyrý jáne sport basqarmasynyń málimetinshe, atalǵan komanda Qazaqstan chempıonatynyń II týryna qala atynan qatysyp jatyr.
— Atalǵan oqıǵaǵa baılanysty Qazaqstan ulttyq voleıbol federatsııasy jattyqtyrýshyny shettetý týraly sheshim qabyldady. Shettetý merzimi men ózge de qabyldanǵan sharalar týraly tolyq aqparat federatsııa tarapynan resmı túrde naqtylanatyn bolady, — delingen basqarma habarlamasynda.
Vedomstvonyń habarlaýynsha, Hamıt Myrzabekov «Voleıbol Kıds» jeke klýbynda shamamen alty-jeti aı jumys istegen. Qazirgi ýaqytta klýb ókiliniń resmı málimetine sáıkes, ol qyzmetinen bosatylǵan. Sondaı-aq jattyqtyrýshynyń Shymkent qalasynyń dene shynyqtyrý jáne sport basqarmasyna qarasty memlekettik sport uıymdarynda jumys istemeıtini aıtylǵan.
Al Pavlodar oblystyq polıtsııa departamentiniń málimetinshe, kámeletke tolmaǵan voleıbolshyǵa jattyqtyrýshynyń kúsh qoldaný deregi boıynsha qylmystyq is qozǵalǵan.
— Oqıǵaǵa qatysýshylardyń barlyǵy anyqtalyp, polıtsııa bólimine jetkizilgen. Qazirgi ýaqytta tergeý amaldary júrgizilip jatyr. Jattyqtyrýshynyń áreketine Qazaqstan Respýblıkasynyń zańnamasyna sáıkes quqyqtyq baǵa beriledi. Tergeý barysy polıtsııa basshylyǵynyń baqylaýynda, — dep habarlady departamentten.
Eske sala keteıik, Qyzylordada jasóspirimdi bapkerdiń zorlaý isi boıynsha tyń derekter belgili boldy.
