Pavlodarda jaramdylyq merzimi ótken dárilik zattardy saqtaý derekteri jıi tirkelgen
PAVLODAR. KAZINFORM — Pavlodar oblysynda jyl basynan beri dárilik zattar men medıtsınalyq buıymdardyń aınalysy salasynda 8 ákimshilik quqyq buzýshylyq týraly hattama toltyrylǵan.
Tekserý barysynda jaramdylyq merzimi ótken preparattar men medıtsınalyq buıymdardy saqtaý, Qazaqstanda tirkelmegen dárilerdiń bolýy jáne retseppen ǵana bosatylýy tıis preparattardy retseptsiz satý faktileri anyqtalǵan.
Bul týraly Kazinform tilshisine Medıtsınalyq jáne farmatsevtıkalyq baqylaý komıtetiniń Pavlodar oblysy boıynsha departamentinen habarlady.
Departament málimetinshe, anyqtalǵan quqyq buzýshylyqtardyń arasynda Qazaqstan Respýblıkasynda tirkelmegen jáne jaramdylyq merzimi ótken dárilik zattardy saqtaý faktileri jıi kezdesedi.
— Atap aıtqanda, dárilik zattardy saqtaý oryndarynda jaramdylyq merzimi ótken dáriler men medıtsınalyq buıymdar anyqtaldy. Keıbir jaǵdaıda mundaı ónimder ruqsatsyz qol jetkizýden oqshaýlanbaǵan. Dárilik zattardy saqtaý qaǵıdalaryn buzý boıynsha 1 ákimshilik hattama toltyryldy. Tekserýler kezinde dárihanalar men medıtsınalyq uıymdarda dárilik zattar men medıtsınalyq buıymdardy belgilengen talaptarǵa saı saqtaý úshin qajetti temperatýra men ylǵaldylyqty baqylaýǵa arnalǵan jabdyqtardyń joqtyǵy anyqtaldy. Al jalpy zań buzýshylyqtar boıynsha 8 hattama resimdeldi, — deıdi departament basshysy Botagóz Syzdyqova.
Anyqtalǵan quqyq buzýshylyqtar kóbine «Plastıkalyq hırýrgııa» beıini boıynsha medıtsınalyq kómek kórsetetin medıtsınalyq uıymdarǵa qatysty bolǵan.
Zań buzǵandarǵa qandaı aıyppul qarastyrylǵan?
Dárilik zattar men medıtsınalyq buıymdardyń aınalysy salasyndaǵy zańnamany buzǵany úshin Ákimshilik quqyq buzýshylyq týraly kodekstiń 426-baby boıynsha ákimshilik jaýapkershilik qarastyrylǵan.
Aıyppul mólsheri quqyq buzýshylyq jasaǵan sýbektiniń mártebesine baılanysty belgilenedi.
Atap aıtqanda:
- jeke tulǵalarǵa — 70 AEK;
- laýazymdy adamdarǵa — 100 AEK;
- shaǵyn kásipkerlik sýbektilerine — 130 AEK;
- orta kásipkerlik sýbektilerine — 200 AEK;
- iri kásipkerlik sýbektilerine — 1000 AEK.
Al Qazaqstanda tirkelmegen nemese qoldanýǵa ruqsat etilmegen dárilik zattar men medıtsınalyq buıymdardy óndirý, satyp alý, tasymaldaý, saqtaý, ótkizý, qoldaný nemese jarnamalaý adam densaýlyǵyna zııan keltirmegen jaǵdaıda da jeke jaýapkershilik kózdeledi.
Bul rette aıyppul mólsheri:
- jeke tulǵalarǵa — 100 AEK;
- laýazymdy adamdarǵa — 150 AEK;
- shaǵyn kásipkerlik sýbektilerine — 200 AEK;
- orta kásipkerlik sýbektilerine — 300 AEK;
- iri kásipkerlik sýbektilerine — 1500 AEK.
Departamenttiń túsindirýinshe, naqty ákimshilik aıyppuldyń mólsheri quqyq buzýshylyq jasaǵan sýbektiniń mártebesi eskerile otyryp aıqyndalady.
Eske sala keteıik, elimizde dári-dármek óndirisi artyp, jańa 494 preparat shyǵarylmaq.
