Pavlodarda jaralanǵan elik qutqaryldy
PAVLODAR. KAZINFORM - Oblys ortalyǵyndaǵy Ýsolka ózeni arqyly ótetin kópir mańynan jaralanǵan elik tabyldy. Jabaıy janýar týraly 109 qyzmetine jergilikti turǵyn habarlaǵan.
Pavlodar orman jáne janýarlar dúnıesin qorǵaý jónindegi mekeme basshysy Ajdar Júsipovtiń aıtýynsha, qala turǵyny tańǵy júgirý kezinde ózenniń sol jaǵalaýynan jaraqattanyp qalǵan janýardy baıqap, 109 qyzmetine habarlasqan.
- Mamandar jetkenshe, jabaıy janýarǵa sol mańda serýendep júrgen zeınetkerler bas-kóz bolǵan. Olar ormanshylardy kútip alyp, janýardy tapsyrdy. Ormanshylar ony qarap shyǵyp, artqy aıaqtary jaraqattanǵanyn anyqtady. Boljam boıynsha qańǵybas ıtterdiń nemese ózge de janýarlardyń shabýylyna ushyraǵan bolýy múmkin, - deıdi Ajdar Júsipov.
Qazir elik Pavlodar aýylyndaǵy belsendi demalys ortalyǵyna jetkizildi. Onda veterınar dáriger tekserip, qajetti em-dom taǵaıyndaıdy.
Buǵan deıin pavlodarlyq ormanshylar jaraqattanyp qalǵan aqqýdy qutqarǵanyn jazǵan edik.
Odan keıin aýyl turǵyny aıazda qalyp qoıǵan qos aqqýdy qutqardy.
Al Maraldy aýylynyń turǵyndary syńarynan aırylyp, jalǵyz qalǵan aqqýdy taýyp alǵan.
Ormanshylar atalǵan aqqýlardyń jaǵdaıyn tekserdi. Olardyń málimetinshe, qustardyń jaǵdaıy jaqsy.