Pavlodarda jańǵyrtylyp jatqan qos shekaralyq bekettiń biri bıyl tolyqqandy jumysyn bastaıdy
PAVLODAR. KAZINFORM - Jańǵyrtý jumystarynyń nátıjesinde beketterdiń ótkizý qabileti keminde eki esege artady dep kútilýde. Onyń biri bıyl jeltoqsanda tolyqqandy jumys isteı bastaıdy.
Memleket basshysy Qasym-Jomart Toqaevtyń kólik-logıstıkalyq ınfraqurylymdy damytý, eldiń tranzıttik áleýetin arttyrý jáne halyqaralyq saýda baılanystaryn keńeıtý jónindegi tapsyrmalaryn iske asyrý aıasynda óńirde Qazaqstan men Reseı shekarasyndaǵy avtokólik ótkizý pýnktterin jańǵyrtý jumystary jalǵasýda.
Qazirgi ýaqytta «Qosaq» jáne «Sharbaqty» ótkizý pýnktterin qaıta jańǵyrtý jumystary júrgizilip jatyr. Reseı Federatsııasynyń Novosibir oblysymen shekarada ornalasqan Ýspen aýdanyndaǵy «Qosaq» avtokólik ótkizý pýnktindegi qurylys jumystary 84%-ǵa aıaqtalǵan. Jobany aıaqtaý aldaǵy jeltoqsan aıyna josparlanǵan.
Kelesi nysan – Reseıdiń Altaı ólkesimen shekarada ornalasqan Sharbaqty aýdanyndaǵy «Sharbaqty» ótkizý pýnkti. Jobany «VD Stroı-ınjınırıng» JShS júzege asyrýda. Qurylys jumystaryn 2027 jyldyń jeltoqsanynda aıaqtaý kózdelgen.
Pavlodar oblysy ákimdiginiń dereginshe, jańǵyrtý jumystarynyń nátıjesinde qos ótkizý pýnktiniń de ótkizý qabileti keminde eki esege artady. Qazirgi ýaqytta olar arqyly táýligine 500-ge deıin kólik quraly men 1 myń adam óte alsa, qaıta jańǵyrtý aıaqtalǵannan keıin bul kórsetkish táýligine keminde 1 myń kólik quraly men 3 myń adamdy quraıtyn bolady. Infraqurylymdy jańartý zamanaýı jabdyqtarmen qamtamasyz etýdi, sondaı-aq kólik quraldaryn, taýarlardy, júk pen jeke tulǵalardy baqylaý rásimderin jetildirýdi de kózdeıdi.
Jalpy 2030 jylǵa deıin shekaralyq ótkizý pýnktterin jańǵyrtý jónindegi respýblıkalyq Jol kartasyna Pavlodar oblysyndaǵy 5 avtokólik ótkizý pýnkti engizilgen. Olar - «Qosaq», «Úrlitóbe», «Sharbaqty», «Amangeldi» jáne «Naıza».
Eske sala keteıik, «Qorǵas» jáne «Alashankoý» shekaralyq toraptaryn jańǵyrtý boıynsha kelisimder jasaldy.