Pavlodarda jańajyldyq is-sharalarǵa jyldaǵydan 8 ese az qarajat bólingen
PAVLODAR. KAZINFORM – Bıyl oblys ortalyǵynda jańa jyldyq is-sharalarǵa jáne qalany bezendirýge 23 mln teńge kózdelgen. Shahar boıynsha 22 hokkeı kortyn quıý jáne 10 syrǵanaý alańyn ornatý josparlanyp otyr.
Qala ákimdiginiń habarlaýynsha, ótken jylǵy merekelik bezendirý qurylǵylary jaramdy kúıde saqtalǵan jáne ol qalany Jańa jyl meıramyna oraı ásemdegen kezde tolyq qoldanylady.
– Ortalyq alańda eki syrǵanaý alańy, jaǵalaýdyń Estaı kóshesimen túsetin ornynda muz qalashyǵy, qalanyń shaǵyn aýdandarynda 22 hokkeı kortyn quıý jáne 10 syrǵanaý alańyn ornatý josparlanǵan. Merekelik bezendirý sheńberinde 3 jasandy qylqandy shyrsha, shyrsha túrindegi 5 metall qurylymyn ornatý, sondaı-aq qala boıynsha shamamen 400 sándik elementter – shaǵyn jasandy shyrshalar, aǵashtardaǵy aspaly bezendirýler, jaryq shamdaryn ornalastyrý kózdelgen. Barlyq is-sharaǵa jáne qalany bezendirýge 23 mln teńge bólindi, - dep habarlady ákimdikten.
Byltyr Pavlodar qalasynda jańajyldyq is-sharalarǵa 190 mln teńge bólingen edi. Bıyl qarastyrylyp otyrǵan qarajat kólemi byltyrǵydan 8 ese az ekeni baıqalady.
Sondaı-aq qysqy kezeńde qalanyń muz korttarynda jáne shańǵy bazalarynda qysqy sport túrleri – bıatlon, shańǵymen júgirý sporty, shańǵy jarystary, mánerlep syrǵanaý, frıstaıl-akrobatıka jáne shaıbaly hokkeı boıynsha jarystar ótedi dep kútilip otyr. Jeltoqsan aıynyń ekinshi jartysynda qalanyń Ortalyq alańynda bas shyrshanyń shamdary jaǵylyp, qala turǵyndary men qonaqtary úshin jańa jyldyq merekelik baǵdarlama uıymdastyrylady.
Al Aqsý qalasynyń bıligi shahardy merekege oraı bezendirýge 3,4 mln teńge kóleminde qarajat qarastyrylǵanyn habarlady. Atalǵan qarajatqa shyrshalardy ornatý, jaryq shamdaryn qurastyrý jáne ózge de bezendirý jumystary kiredi.
Eske sala keteıik, 2024 jyldyń qańtar aıynda Pavlodarda 52 mln teńgeniń shyrshasy qatty jelge shydamaı omaqasa qulaǵan. Keıin ákimdik ókilderi onyń qaıtadan qalpyna keltirilgenin málimdegen edi. Atalǵan shyrsha bıyl da alańǵa qaıta qurylady.