Pavlodarda jańartylyp jatqan áýejaı qashan ashylady
PAVLODAR. KAZINFORM – Pavlodar qalasy áýejaıynyń ushý-qoný jolaǵyn qaıta jańartý jumystaryna bıýdjetten 16,4 mlrd teńge bólingen.
Qazirgi ýaqytta áýejaıdy jóndeý jumystary bel ortaǵa taıap qalǵan. Oblys ákimdiginiń málimetine súıensek, ushý-qoný jolaǵyn qaıta jańartýǵa bólingen qarajat jobany tolyq aıaqtaýǵa jetkilikti.
– Merdiger uıym «KyrylysGroup RK» JShS ári qaraı asfalt-beton jabynyn tóseý jumystaryn júzege asyrý úshin ushý-qoný jolaǵynda deformatsııalyq jikterdi ornatý jumystaryn júrgizip jatyr. Jobanyń jalpy quny – 16,4 mlrd teńge. Onyń ishinde Ulttyq qordan 4,8 mlrd teńge, respýblıkalyq bıýdjetten 600 mln teńge jáne oblystyq bıýdjetten – 1,6 mlrd teńge qarastyrylǵan. Al arnaıy memlekettik qordan 9,3 mlrd teńge bólingen, – dep habarlady Kazinform tilshisine Pavlodar oblysy ákimi apparaty basshysynyń mindetin atqarýshy Baýyrjan Qapenov.
Búginde perronda, jer ústimen júrý jolynda jáne ushý-qoný jolaǵynda asfalt-beton jabynyn frezerleý, jol jamylǵysynyń negizin ornatý jumysy oryndalǵan. Buǵan qosa perronda jerge tuıyqtaý kontýry, al ushý-qoný jolaǵy men ózge de júrý bólikterinde drenaj júıesi salynǵan. Odan bólek perımetrlik qorshaý, beınebaqylaý júıesi jáne perımetrdi jaryqtandyrý jumysy da aıaqtalǵan.
– Jumystardyń jalpy oryndalý deńgeıi – 51%. Jobany aıaqtaý merzimi 2026 jyldyń shilde aıyna belgilengen. Al áýejaıdy paıdalanýǵa berý tamyz aıyna josparlanyp otyr. Áýejaı ashylǵan ýaqytta Pavlodar-Astana, Pavlodar-Almaty baǵyttary boıynsha áýe reısterin qaıta jandandyrý kózdelip otyr. Sonymen qatar Shymkent qalasyna, Batys Qazaqstan oblysyna, sondaı-aq Reseı Federatsııasy, Belarýs, Túrkııa jáne Mysyr memleketteri baǵyttarynda halyqaralyq reıster ashý máselesi qarastyrylyp jatyr, – dedi ákimdik ókili.
Áýejaıdyń qyrýar qarjyǵa jańarýy keleshekte ushaq bıletiniń qymbattaýyna negiz bolýy múmkin be degen suraǵymyzǵa ákimdiktegiler: «Búgingi tańda ushaq bıletiniń qunyn ósirý josparda joq» dep jaýap berdi.
Eske sala ketsek, byltyr qarjy jetkiliksizdigine baılanysty Pavlodar áýejaıyn jóndeý taǵy bir jylǵa uzarǵan edi.
Pavlodar áýejaıy qaıtarylǵan aktıvter esebinen rekonstrýktsııalanatyny týraly da jazdyq.