Pavlodarda jańa jyldyq kesh ótip jatqan meıramhanaǵa jarylǵysh qoıyldy dep qońyraý shalǵan
PAVLODAR. KAZINFORM - Polıtsııa jarylǵysh zat qoıyldy dep jalǵan habarlama túsirgen turǵynnyń jeke basyn anyqtady. Terrorızm aktisi týraly jalǵan habarlaý deregi boıynsha qylmystyq is qozǵaldy.
Áleýmettik jelide Pavlodardaǵy «Іnjý» meıramhanasynyń janynda polıtsııa men 102, 103 qyzmetteriniń kólikteri úıilip turǵanyn kórsetetin vıdeo tarap ketti.
Belgili bolǵandaı, meıramhanada jańa jyldyq kesh ótip jatqan sátte áldebireý habarlasyp, jarylǵysh zat qoıylǵanyn málimdegen. Polıtsııa men ózge de jedel qyzmetter oqıǵa ornyna kidirmesten jetip, meıramhanadan jalpy sany 50 adamdy evakýatsııalaǵan.
Pavlodar oblysy polıtsııa departamentiniń baspasóz qyzmeti ǵımaratqa jarylǵysh zat qoıylǵany týraly habarlamanyń jalǵan bolǵanyn málimdedi. Arnaıy qyzmetter eshbir kúdikti zatty tappaǵan.
- Terrorızm aktisi týraly kórineý jalǵan habarlaý faktisi boıynsha qylmystyq is qozǵaldy. Qońyraý shalýshynyń jeke basy anyqtalyp, is júrgizý úshin polıtsııa bólimine jetkizildi. Oqıǵanyń mán-jaıy men sebepteri tergeý barysynda anyqtalatyn bolady, - dep habarlady departamentten.
Jalǵan jarylǵysh zattyń dúrbeleńi basylǵan soń meıramhanadaǵy jańajyldyq kesh qaıta jalǵasqan.
Eske sala keteıik, Jetisaılyq oqýshy mektepte jarylǵysh zat qoıylǵanyn habarlaǵan.