Pavlodarda jańa jyldan bastap jylý arzandaýy múmkin

PAVLODAR. KAZINFORM — Oblys ortalyǵynda jylý tarıfi arzandaýy múmkin. Tabıǵı monopolııalardy retteý komıtetiniń Pavlodar oblysy boıynsha departamenti naqty sheshimin aldaǵy ýaqytta jarııa etetin bolady.

Tabıǵı monopolııalardy retteý komıtetiniń Pavlodar oblysy boıynsha departamentiniń basshysy Nurlan Nurmuratov birneshe monopolıst keler jylǵa tarıfterin ósirý boıynsha ótinim jasaǵanyn habarlady.

— «Pavlodarenergo» JShS, «Pavlodar jylý jelileri» JShS jáne «Pavlodarenergosbyt» JShS tarıfterin kóterý týraly ótinim túsirdi. Energııalyq kompanııalar muny kómir baǵasynyń qymbattaýymen túsindirip otyr. Monopolıster 2025 jylǵa kómir baǵasyn tonnasyna 2900 teńge dep belgilep qoıǵan, al onyń boljamdy baǵasy 3400 teńge bolady dep kútilýde. Energııa kózderi mysal úshin bir mln tonna kómir satyp alsa, oǵan qarastyrylǵan shyǵyndary qosymsha 500 mln teńgege ósedi degen sóz. Biraq Pavlodar qalasynda qazirgi qoldanystaǵy jylý tarıfiniń qymbat ekeni anyqtaldy. Ol shamamen 6,7%-ǵa negizsiz ósirilgen dep oılaımyz, — deıdi N.Nurmuratov.

Mamandar qoldanystaǵy tarıfter men jańa tarıftik usynymdardy qarastyra kelip, jańa jyldan bastap ony ósirmeý týraly sheshim qabyldaǵan. Qoldanystaǵy tarıf aldaǵy ýaqytta sál arzandaýy da múmkin. Ol boıynsha túpkilikti sheshimdi monopolııaǵa qarsy organ habarlaıdy.

Buǵan deıin Úkimet basshysy Oljas Bektenov kommýnaldyq qyzmet tarıfteri men baǵalarynyń negizsiz ósýin baqylaýǵa alýdy tapsyrǵan bolatyn.