Pavlodarda jańa týǵan sábıin 800 myń teńgege satpaq bolǵan áıel sottaldy
ASTANA. KAZINFORM — Pavlodarda jańa týǵan qyz balasyn 800 myń teńgege satýǵa kelisken áıel bes jylǵa bas bostandyǵynan aıyryldy. Alaıda Qylmystyq kodekstiń 74-baby negizinde jazany óteý bes jylǵa keıinge qaldyryldy.
Pavlodar qalasynyń prokýratýrasy jańa týǵan náresteni zańsyz satý faktisi boıynsha qylmystyq is boıynsha memlekettik aıyptaýdy qoldady.
Sotta anyqtalǵandaı, 2002 jyly týǵan Túrkistan qalasynyń turǵyny materıaldyq qıyndyqtarǵa baılanysty júkti kezinde dúnıege kelmegen balasyn aqshaǵa satýdy josparlaǵan.
— Osy maqsatta ol «VKontakte» áleýmettik jelisindegi «bala asyrap alǵym keledi» atty qaýymdastyqta habarlandyrý jarııalap, satyp alýshy taýyp, jańa týǵan qyz balany 800 000 teńgege satýǵa kelisken. 2026 jylǵy 28 naýryzda áıel Pavlodar oblystyq № 1 perınataldyq ortalyǵynda deni saý qyz balany dúnıege ákelgen. Qala prokýratýrasynyń úılestirýimen júrgizilgen jedel-izdestirý is-sharalary men jasyryn tergeý áreketteri barysynda qylmystyq áreket áshkerelendi, — delingen habarlamada.
Jedel is-shara sheńberinde satyp alýshy rólin atqarǵan tulǵaǵa serııalyq nómirleri aldyn ala tirkelgen aqsha qarajaty berildi. 2026 jylǵy 31 naýryzda Pavlodardaǵy páterlerdiń birinde sottalǵan áıel jańa týǵan náresteni oǵan qatysty medıtsınalyq qujattarymen birge satyp alýshyǵa tapsyryp, 100 000 teńge kóleminde syıaqy aldy.
Pavlodar qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynyń úkimimen áıel Qazaqstan Respýblıkasy Qylmystyq kodeksiniń 135-babynyń 1-bóligimen («Kámeletke tolmaǵandar saýdasy») kináli dep tanylyp, oǵan qylmystyq-atqarý júıesiniń ortasha qaýipsizdik mekemesinde óteýmen 5 jyl merzimge bas bostandyǵynan aıyrý jazasy taǵaıyndaldy.
Qazaqstan Respýblıkasy Qylmystyq kodeksiniń 74-baby negizinde taǵaıyndalǵan jazany óteý 5 jyl merzimge keıinge qaldyryldy.
Eske salaıyq, buǵan deıin Aqtóbede sábıin qoqysqa tastap ketken anaǵa qatysty qylmystyq is qozǵalǵanyn habarlaǵan edik.
