Pavlodarda jańa tramvaılar jolǵa shyqty
PAVLODAR. KAZINFORM — Oblys ortalyǵynda Belarýs elinde jasalǵan 4 jańa vagonnyń tanystyrylymy ótti. Sáýir aıynyń sońyna deıin taǵy 6 tramvaı jetkiziledi dep kútilip otyr.
Qazirgi ýaqytta Pavlodar qalasynda 11 tramvaı baǵyty jumys isteıdi. Kún saıyn jelige 83 tramvaı shyǵyp, qala ortalyǵynyń turǵyndaryna, óndiristik kásiporyn jumysshylaryna da qyzmet kórsetedi. Jyl saıyn bul ekologııalyq kólik túrimen 15 mıllıonǵa jýyq adam jol júredi.
Jańa vagondar 160 adamǵa shaqtalǵan, onyń 36-sy — otyratyn oryn. Basty erekshelikteriniń biri — avtonomdy júrý múmkindigi, ıaǵnı elektr jelilerinsiz qozǵala alady. Batareıa arqyly vagondar 60 km/saǵ jyldamdyqpen 20 shaqyrymǵa deıin júredi.
Mundaı tramvaılar jańa baǵytty iske qosý maqsatynda arnaıy satyp alynǵan. Bıyl «Dostyq» shaǵyn aýdanynda tramvaı jelisiniń qurylysy bastalady.
— Jeli boıynsha merdiger anyqtaldy, jer jaǵdaıy múmkindik bergen boıda iske kirisedi. Sebebi jol tóseýge qatysty qıyndyqtar bar, ol jerdi tazartý kerek. Joba tehnıkalyq turǵydan kúrdeli bolǵandyqtan, ony kelesi jyldyń jazynyń sońyna deıin tolyq aıaqtap, paıdalanýǵa berýdi josparlap otyrmyz, — dedi Pavlodar oblysynyń ákimi Asaıyn Baıhanov.
Eske sala keteıik, jańa vagondar Pavlodarǵa 2025 jyldyń sońyna deıin jetkizilýi tıis bolatyn. Alaıda Belarýs eline salynǵan sanktsııalarǵa baılanysty shart jasasý kezinde qıyndyqtar týyndaǵan edi.
Buǵan deıin Belarýs tramvaılary Pavlodarǵa ne sebepti jetkizilmeı jatqanyn jazǵan bolatynbyz.
Al bıylǵy jyl basynda «D. D. Mahmýdov atyndaǵy Pavlodar qalasynyń tramvaı basqarmasy» AQ aktsııalar paketi «Pavlodar» áleýmettik-kásipkerlik korporatsııasynan Pavlodar oblysy ákimdiginiń kommýnaldyq menshigine berildi.
